Apirilean aire zabalean
Idiazabalgo Udalak datorren hilabeterako prestatutako kirol eta kultur eskaintza aurkeztu du. Gaur 'Lilaldi'-ko azken ekintza izango da: 'Askotariko ahotsak' dokumentala, 18:00etan
Martxoa amaitzear den honetan, udalaren Lilaldiko egitarauari gaur emango diote amaiera Idiazabalen. Askotariko ahotsak dokumentala eta solasaldia izango da 18:00etan udaleko areto nagusian, Aizan talde feministak antolatuta. Apirilerako ere, egitarau zabala prestatu du idiazabalgo Udalak, Apirilean aire aire! goiburupean. Kultur eta kirol eskaintza da nagusi, eta pandemia dela eta, aire zabaleko ekintzak lehenetsi dituzte. Apirilaren 1ean ekingo diote egitarauari eta apirilaren 24an izango da azkena. Martxoan atzeratutako Porrotx eta Marimototsen Amaren intxaurrak emanaldia apirilaren 23an izango da, eta sarrera guztiak agortuta daude. Mendi ibilaldiak eta bisita gidatuak ere egingo dituzte. Horietan parte hartu nahi dutenek aurrez eman behar dute izena liburutegian.
Kultur eta kirol eskaintzaz gain, aisialdi ekintzak ere egongo dira, apirilaren 6tik 9ra Udaberrilekuak‘ antolatu baitituzte. «75 haur apuntatu dira aisialdi hezitzailea oinarri duen egitasmo honetara», azaldu du Izaro Intsausti Zinkunegi kultur teknikariak. Adin ezberdinetako herritarrentzat pentsatuta osatu dute Apirilean aire aire!. «Etxeko txikienenetatik hasita, gazte eta helduentzako egitarau oparo eta zabalaz gozatzeko aukera zango da Idiazabalen», esan du Aloña Barandiaran Munduate kultur zinegotziak.
Pintura txapelketa
I. aire libreko pintura txapelketaren bidez, partaideen irudimena baliatuz herriko ondarea jasotzeko lanak bilduko ditu udalak. Hiru maila egongo dira: 2006an jaioak edo hortik gorakoak, 2007-2009 artean jaiotakoak, eta 2010-2013 artean jaiotakoak.
Apirileko egitaraua
· APIRILAK 1-11. Goierri mende bat lehenago erakusketa jarriko dute herriko dendetako erakusleihoetan, Leminstaka Zientzia elkartearen eskutik.
· APIRILAK 4 eta 11. Mendi ibilaldiak antolatu dituzte goiko larretara eta Urtsuaranera.
· APIRILAK 5. Idiazabalgo San Migel elizara bisita.
· APIRILAK 6. Bisita gidatuak egingo dituzte Indianoen etxeetara.
· APIRILAK 10. Aire Libreko I. Pintura txapelketa.
· APIRILAK 12. I. Pintura txapelketako sariak banatu eta koadroen erakusketa jarriko dute udaletxeko areto nagusian.
· APIRILAK 17. Xapolarunbaten itzulera eta Gaztetxoak kirolera ekimenaren hasiera.
· APIRILAK 18. Aranzadi elkarteko Alfredo Morazak gidatutako bisita San Adrianera.
· APIRILAK 23. Porrotx eta Marimototsen Amaren intxaurrak emanaldia Igarondo pilotalekuan.
· APIRILAK 24. Berri Txarrak taldearen Dardara dokumentala ikusgai, Guraso Elkartean, 3 euroan.
