Goierriko intzidentzia 900 kasuetatik jaitsi da

Beste 50 kasu atzeman dira eskualdean, baina intzidentziak beheraka jarraitzen du. Legazpiren kasua da kezkagarriena, azken lau egunetan 67 kasu atzeman baitira

Kerman Garralda

Goierri

2021/04/15

Goierrin alarma gorriak piztuta jarraitzen du, baina intentsitatea murrizten ari da. Intzidentzia tasak pazko-bigarrengoan goia jo zuenetik behera egiten ari da, eta gaur 900 kasuetatik jaisti da. 877an dago azken datuen arabera.

Egoera larria da oraindik ere. Lau mailako arrisku eskalan laugarrengoan dago Goierri. Bikoiztu egiten du 100.000 biztanleko 400 kasuetako muga. Urteko daturik txarrenetarikoak izaten jarraitzen dute. Pentsaezina da berehalakoan 60 kasuetaraino murriztea, Eusko Jaurlaritzaren helburua horixe izan arren.

Legazpik du egoera okerrena. Gaurkoan beste 15 kasu baieztatu dira. Aurreko egunekoei gehituta, 67 lagun gaixotu dira covid-19arekin astea hasi zenetik. Azken hamalau egunetako intzidentzia tasa 1.391,37 gaixoetakoa da. 5.000 biztanletik gorako Gipuzkoako herrien artean, intzidentzia tasa handiena duen herria da.

Goierriko gainerako herririk populatuenak ere eremu gorrian daude. Beasainen, esaterako, hamar kasu atzeman dira azken orduetan. Halere, intzidentzia tasak behera egin du, 684,69 kasuetara, martxoaren 31n, duela hamabost egun, hamalau kasu atzeman zirelako; Lazkaon, Ordizian eta Zumarragan ere behera egin du intzidentzia tasa. Urretxun, aldiz, gora.

Gabirian beste bi kasu agertu dira. Gaur gaurkoz, neurri murriztaileak aplikatzeko hiru baldintzak betetzen ditu: 1364,52eko intzidentzia tasa, Zumarragako osasun eremua gorrian dago eta azken astean sei kasu baieztatu dira; Ataunen kasua ere berdina da. Gainera, beste hiru positibo baieztatu dira gaurko txostenean. Ormaztegiren kasuan, aldiz, intzidentzia tasa 400 gaixoetako mugaren azpitik kokatu da.

	Positibo berriak	Positiboak denera	Intzidentzia tasa
Altzaga	0	5	546,45
Arama	0	18	0
Ataun	3	182	915,86
Beasain	10	1.480	684,69
Ezkio eta Itsaso	0	33	630,91
Gabirira	2	20	1.364,52
Gaintza	0	10	877,19
Idiazabal	0	137	420,17
Itsasondo	0	61	1.648,35
Lazkao	2	491	799,01
Legazpi	15	688	1.415,15
Legorreta	2	156	805,37
Mutiloa	0	15	0
Olaberria	0	66	654,31
Ordizia	3	1.215	566,04
Ormaiztegi	0	101	235,11
Segura	0	187	1.147,17
Urretxu	6	525	790,75
Zaldibia	1	283	4.041,01
Zegama	0	176	920,45
Zerain	0	12	0
Zumarraga	6	867	753,49
GOIERRI	50	6.728	877,69

“Kezkatuta”

Iñigo Urkullu Lehendakariak egoerarekin “kezkatuta” dagoela aitortu die kazetariei, Legebiltzarrerako sarreran. Urkulluk esan du Labiren batzorde politikoa deitu ala ez labi teknikoaren diagnosiaren araberakoa izango dela. Batzorde politikoak du neurriak aldatzeko eskumena. Ez direla malgutuko ziurra da, baina gogortuko ote dituzten ez dago argi. Lehendakariak berretsi du egungo neurriak zorrotz betez gero nahikoak direla.

Azken elkarrizketak

Azken bideoak

Argitalpen bereziak