'Kalitatezko konposta zuri esker' kanpaina abiatu du Sasieta mankomunitateak
Materia organikoarekin egindako konposta banatu eta informazioa emateko karpa bat jarriko dute hamalau udalerritan. Atzo Ataunen hasi, eta maiatzaren 21ean amaituko da, Legazpin
Sasieta mankomunitateak Kalitatezko konposta zuri esker kontzientziazio kanpaina jarri du martxan. Atzotik hasita, karpa txiki bat jarriko dute mankomunitateko 14 udalerritan egun ezberdinetan, herritarrei Gipuzkoan gaika bildutako materia organikoarekin egindako konposta doan banatzeko eta horren inguruko informazioa emateko. 5 kilo inguruko poltsa emango da etxebizitza bakoitzeko. Maiatzaren 21ean amaituko da kanpaina, Legazpin.
Etxebizitzetan egunero hondakinak txukun bereizten dituztenei eskerrak emateko modua dela adierazi du Sasietak ohar baten bidez: «Lan isil horrek mankomunitatean batez beste %76ko gaikako bilketako indizea lortzera eraman gaitu». Etorkizunari begira, bi erronka dituzte: %80ko gaikako bilketako indizea lortzea eta bildutako materialaren kalitatea hobetzea. Bildutako materialaren kalitatea baita «zirkularidadearen giltzarria». Konposta oparitzeaz gain, bi hezitzaile izango dira karpetan zalantzak argitzeko. Konposta jasotzeko ezinbestekoa izango da poltsa konpostagarriak jasotzeko txartela eramatea.
KANPAINA HERRIZ HERRI
· Ordizia. Frontoiaren ondoan.Gaur (16:00- 20:00) eta bihar (09:00- 13:00).
· Idiazabal. Apirilaren 29an herriko plazan (16:00-20:00).
· Legorreta. Apirilaren 30ean herriko plazan (16:00-20:00).
· Beasain. Maiatzaren 3an eta 4an Gernikako pasealekuan (09:30-12:30 eta 16:00-20:00).
· Urretxu. Areizaga-Kalebarren plazan. Maiatzaren 5ean (16:00- 20:00) eta maiatzaren 6an (09:00- 13:00).
· Olaberria. Maiatzaren 7an Iurre auzoan (16:00- 20:00).
· Lazkao. Herriko plazan. Maiatzaren 10ean (09:00- 13:00) eta maiatzaren 11n (16:00- 20:00).
· Zumarraga. Maiatzaren 12an Euskadi plazan (16:00-20:00), eta maiatzaren 13an Kalebarren plazan, ordu berean.
· Ormaiztegi. Maiatzaren 14an herriko plazan, (16:00-20:00).
· Segura. Maiatzaren 17an San Joan plazan (16:00- 20:00).
· Zaldibia. Maiatzaren 18an herriko plazan (16:00-20:00).
· Zegama. Maiatzaren 19an Jose Maiora plazan, (16:00- 20:00).
· Legazpi. Maiatzaren 20an Laubideko oinezkoen guneko 31. zenbakian (16:oo-20:00), eta maiatzaren 21ean, kanpaina amaitzeko, Euskal Herria plazan (09:00-13:00).
