Positiboek eta inzidentziak behera egin dute Goierrin
Osasun Sailaren arabera 67 positibo atzeman dituzte asteburuan Goierrin. Eragin-tasak orokorrean behera egin badu ere, hainbat herrik 400eko mugaren gainetik jarraitzen dute. Goierri garaian pilatu dira kasu berri gehienak.
Urretxun, Zumarragan eta Legazpin agertu dira asteburuko kasu berririk gehienak. 
Hainbat astetako igoeraren ondoren, koronabirusaren datuek behera egin dute asteburuan, bai positibo berriei dagokionean, eta baita eragin-tasari dagokionean ere. Ostiraletik igandera, beste 67 kasu atzeman dituzte eskualdean, Osasun Sailak gaur argitaratu duen txostenaren arabera. Herri askok, 400eko tasaren gainetik jarraitzen dute, hala ere.
Daturik okerrenak Goierri garaiko hiru herri handietan izan dituzte. Legazpin 16 positibo atzeman dituzte, Urretxun 15 eta Zumarragan 14. Kopuru horietatik behera dabiltza gainontzeko herri guztiak. Beasainen eta Ordizian zazpina kasu agertu dira, Ataunen 4, eta bana Idiazabalen, Lazkaon, Legorretan eta Seguran.
Eragin-tasari dagokionean, Altzagak (1639,34), Legazpik (1629,21) eta Olaberriak (1417,67) dituzte daturik okerrenak. Zaldibia eta Zumarraga milako mugatik jaitsi dira, baina 400etik gora jarraitzen dute, Ataun, Lazkao, Legorreta, Ordizia, Segura eta Urretxurekin batera. Itsasondo, Legorreta eta Gabiria zenbaki gorrietatik atera dira.
Eusko Jaurlaritzak datozen orduetan argitaratuko du itxiera eta bestelako neurriak aplikatuko zaizkien herrien zerrenda.
Iazko martxoan osasun krisia hasi zenetik, Goierrin 7.389 COVID-19 positibo kasu izan dira.
| 04/30 | 05/01 | 05/02 | DENERA | TASA | |
| Altzaga | 0 | 0 | 0 | 11 | 1639,34 |
| Arama | 0 | 0 | 0 | 18 | 0 |
| Ataun | 2 | 1 | 1 | 200 (+4) | 858,61 |
| Beasain | 1 | 4 | 2 | 1.532 (+7) | 256,76 |
| Ezkio eta Itsaso | 0 | 0 | 0 | 41 | 946,37 |
| Gabiria | 0 | 0 | 0 | 23 | 194,93 |
| Gaintza | 0 | 0 | 0 | 10 | 0 |
| Idiazabal | 1 | 0 | 0 | 144 (+1) | 294,12 |
| Itsasondo | 0 | 0 | 0 | 67 | 274,73 |
| Lazkao | 1 | 0 | 0 | 527 (+1) | 461,65 |
| Legazpi | 9 | 4 | 3 | 865 (+16) | 1629,21 |
| Legorreta | 0 | 1 | 0 | 165 (+1) | 469,80 |
| Mutiloa | 0 | 0 | 0 | 15 | 0 |
| Olaberria | 0 | 0 | 0 | 80 | 1417,67 |
| Ordizia | 4 | 1 | 2 | 1.281 (+7) | 546,18 |
| Ormaiztegi | 0 | 0 | 0 | 106 | 156,74 |
| Segura | 0 | 0 | 1 | 194 (+1) | 456,62 |
| Urretxu | 7 | 4 | 4 | 607 (+15) | 878,61 |
| Zaldibia | 0 | 0 | 0 | 306 | 904,70 |
| Zegama | 0 | 0 | 0 | 181 | 328,73 |
| Zerain | 0 | 0 | 0 | 13 | 0 |
| Zumarraga | 4 | 4 | 6 | 993 (+14) | 977,50 |
| GOIERRI | 29 | 19 | 19 | 7.389 (+67) |
* Datuetan egun batetik bestera egon daitezkeen aldeak, Eusko Jaurlaritzak asteroko datuak eguneratzean egiten dituen aldaketei dagozkio.
