Lazkao Txiki Bertsopaper sariketan parte hartzeko epea uztailaren 1era arte
Ordiziako Argi Berri elkarteak antolatu du lehiaketa 30.enez.
Iazko sarituak, antolakuntzako kideak eta udal ordezkariak. Arg: Andrea Aranburu Abian da 30. Lazkao Txiki Bertsopaper lehiaketa, Ordiziako Argi Berri elkarteak antolatuta. Uztailaren 1a baino lehen bidali behar dira lanak e-postaz (aitor-c@aek.eus) edo posta arrunt bidez (Argi Berri elkartea, Gipuzkoa kalea 15, 20240, Ordizia).
Lehiaketa hiru mailatan egingo da. Gaztetxoen mailan (13 urte artekoak) neurria eta doinua libreak izango dira, ez ordea gaia, eta Nik ere asko maite zaitut izango da. Parte hartzaile bakoitzak nahi adina bertsopaper bidal ditzake. Bertsopaper bakoitzeko idatzi beharreko bertsoak gutxienez 2 eta gehienez 4 izango dira.Sarituak hiru izango dira; 200 euro eta Txikia oroigarria jasoko ditu irabazleak, 100 euro bigarrenak eta 50 euro hirugarrenak.
Gazteen mailan (14-18 urte bitartekoak) eta helduen mailan (2002an edo aurretik jaiotakoak), gaia, neurria eta doinua, librea izango da. Partaideek, nahi adina bertsopaper bidal ditzakete. Bertsopaper bakoitzeko idatzi beharreko bertsoak gutxienez 8 eta gehienez 12.Lehen hiru gazteek, 300 euro eta Txikia oroigarria, 200 euro eta 100 euro jasoko dituzte. Helduen artean berriz, lehen, bigarren eta hirugarren sailkatuek, 500 euro eta Txikia oroigarria, 400 euro eta 300 euro jasoko dituzte, hurrenez hurren.
Informazio gehiagorako, deitu 649 011 262 telefono zenbakira.
