Kutxa Bira Segurara iritsiko da igandean birari amaiera emateko
Ekitaldi nagusia 13:00etan izango da frontoi ondoko futbito zelaian. Galerna taldeak kontzertua emango du 18:00etan. Bi ekintzetarako sarrerak hartu behar dira, Elorripen
Euskal Herria eta euskara erdigunean jarri dituen Iparra-Hegoa elkarteak antolatutako Bizi gira…kutxa Bira! ekimena azken herrira iritsiko da igandean, maiatzak 30. Euskal diasporan hasi eta Euskal Herrian barrena ibili ondoren, Segurara helduko da eta bertan emango diote amaiera Kutxa Birari. Gainontzeko herrietan bezala, Seguran ere hainbat ekintza antolatu dituzte kutxari harrera egin eta bertan sartutako aldarrikapenak partekatzeko.
Gaur Hernanin eta Igeldon izango da, eta bihar Donostian, Azkainen eta Urruñan. Eta bertatik Goierrira. Igandean eguerdi alderako iritsiko da kutxa Segurara. 13:00etan izango da ekitaldi nagusia, frontoi ondoan dagoen futbito zelaian. Herri guztietan mezu orokorra izan den Amets Arzallusek idatzitako Hitza da gure lurra testua irakurriko dute, eta Euri Albizu antolatzaileak azaldu duenez, jasotako aldarrikapen eta amets guztiei ahotsa emango diete bertan: «Herri guztietan utzitako mezuak irakurriko dira». Orduerdi lehenago irekiko dituzte ateak zelaira sartzeko, 12:30ean.
Arratsaldean, berriz, Galerna talde segurarrak kontzertua emango du leku berean, 18:00etan. Haien lehenengo emanaldia izango da. Ekitaldi nagusirako zein kontzerturako aldez aurretik hartu behar dira txartelak Elorripen, aforoa mugatua izango baita.
Bi hilabeteko bira
Koronabirusaren egoera dela eta, Korrika, Herri Urrats edota Durangoko Azoka bezalako ekimenak bertan behera geratu dira aurten, eta horrek euskalgintzan, saretzean eta euskal nortasunean izan duen eragina apaltzeko asmoz jarri zuten martxan ekimena. Parte hartzaileek euskal komunitatea batzen eta amestutako Euskal Herria irudikatzen dituzten mezuak sartu dituzte kutxan. Martxoaren 20an abiatu zen zurezko kutxa Argentinako Viedma-Patagones eskualdetik, eta diasporan ibili eta gero apirilaren 8an iritsi zen Baionara. Euskal Herriko 70 herritan egin diote ongietorria kutxari, eta bi hilabete pasatxoren ondoren, igandean amaituko da ekimena.
Gaur ikuskizuna
Igandeko ekintzez aparte, gaur ere Kutxa Birari lotutako jarduerak izango dira Seguran. 18:30ean, beheko eskoletan, Pontx pailazoaren ikuskizuna izango da, eta 18:30etik 20:00etara, aldiz, Kutxa Birako kamisetak banatu eta salduko dituzte plazan.
Segura Irratiak ‘streaming’ bidez emango du
65 urte bete berri ditu Segura Irratiak aurten, eta erronka berri bat jarri dio bere jardunari: streaming bidezko zuzenekoak eskaintzea, Segurako elkarte ezberdinekin elkarlanean. Horren harira, Segura Irratiak streaming bidez emango du igandeko Kutxa Bira amaiera ekitaldiaren berri. Eguerdiko 12:30etik aurrera, segurairratia.eus helbidean sartu eta ekitaldi osoaz gozatzeko aukera izango da.
