HITZArekin eta Goikaravanekin, autokarabanan
Goierriko Hitzak eta Goikaravan alokairu enpresak antolatutako Udako Zozketak badu irabazlea. Unai Zubiarrain saridunak Pirinioetara joateko asmoa du autokarabana hartuta, familiarekin.
Udarako ba al da plan hoberik autokarabana hartu eta batetik bestera leku berriak ezagutzen ibiltzea baino? Horretarako aukera izango du Unai Zubiarrainek. Goierriko Hitzak eta GoiBerri-k, Zegamako Goikaravan enpresarekin elkarlanean, Hitza-ren lagunentzat antolatutako lehiaketan parte hartu du, eta zortedun izan da.
Zubiarrain gustura agertu da sariarekin. Zerainen bizi da, eta beti babestu izan du eskualdeko euskarazko prentsa, hasiera-hasieratik baita Goierriko Hitzaren harpideduna. Gurpil gainean bidaiatzearen mundua ezagutzen du lehendik ere, horretarako prestatutako furgoneta bat baitauka. Orain, ordea, «neurri handiagoko etxean bidaiatzeko aukera» izango du. Familia hartuta, Pirinioetara joateko asmoa duela dio.
Irakurleei esker ona
Goierriko euskarazko prentsa jarraitzen eta laguntzen duten irakurleak saritzeko asmoz egindako zozketa izan da. Eta sekulako parte-hartzea izan du: guztira, 557 lagunek eman dute zozketarako izena.
