Ion Izagirre, Cofidis taldera
Ormaiztegiarrak Astana taldea utzi eta Team Cofidis taldearekin 'fitxatu' du, talde frantziarrak jakinarazi duenez. Bi anaiak ez dira elkarrekin ariko.
Astana taldeko hiruko goierritarra desegin egin da. Duela aste batzuk zabaldu zen Gorka Izagirre eta Alex Aranburu Movistar taldean ariko zirela. Gaur berriz, Cofidis taldeak eman du notizia; Ion Izagirre talde frantziarrean ariko da datorren denboraldian. Urtebeteko kontratua egin diote.
Izagirre anaietan gazteena “oso gustura” agertu da fitxaketarekin eta “urtea hasteko” eta “taldekide berriekin aritzeko” gogoz dagoela, baita “helburu berriak” izateko ere. 32 urteko ormaiztegiarrak 12 denboraldi egin ditu profesional mailan, eta Cofidis taldeak haren “esperientzia” azpimarratu nahi izan du, 15 garaipen lortu baititu bere ibilbidean zehar.
