Elbereth, Anker eta Rodeo taldeen kontzertua, Gaztetxean
Larunbatean metal eta stoner doinuak zuzenean entzuteko aukera izango da Legazpiko Gaztetxean. Anker talde legazpiarrak lehen diskoa aurkeztuko du.
Metal musika entzuteko aukera izango da larunbatean Legazpiko Gaztetxean, Elbereth, Anker eta Rodeo taldeek emango duten kontzertuari esker. Kontzertua 22:00etan hasiko da.
Elbereth eta Anker Legazpiko taldeak dira, eta heavy metal musika lantzen dute. Rodeo, berriz, Zestoatik etorriko da, stoner musikarekin.
Anker, disko aurkezpena
Joan den astean kaleratutako Gizagaitza lana aurkezteko baliatuko du larunbateko kontzertua Anker taldeak. Taldearen lehen diskoa da, eta hamar abestiz osatuta dago. Horietako birekin, Ekaitza eta Garai berri baten hasiera, bideoklipak ere egin dituzte eta YouTuben daude ikusgai.
Gizagaitza diskoa 10 euroan dago salgai Legazpiko Kukue, Giroa, Karibe Zaharra eta Maiatza tabernetan, eta Lazkaoko Arranon. Taldearen sare sozialen bidez ere erosi daiteke.
John Dealer, EP berria
Legazpiko John Dealer & The Coconuts taldeak ere lan berri bat kaleratu du duela aste batzuk, Snake charmer izeneko EP-a. Lau abestiz osatuta, rock & roll doinuak dira nagusi. EP-a Legazpiko tabernetan dago salgai.
