Euskal Herriko 45. Dantza Txapelketa jokatuko da larunbatean Seguran
Euskal Herriko lau lurraldetako 15 bikote lehiatuko dira. Goizean, 12:30ean, genEroa dantza ikuskizuna izango da plazan, eta euria ari badu Laiotz herri eskolako patioan
Larunbatean, urriak 16, 45. Euskal Herriko Dantza txapelketa jokatuko da Segurako Baratze pilotalekuan, 18:00etan. Euskal Herriko 15 bikotek parte hartuko dute. Dantzariek zortzi pausoko fandangoa txistuz Isilkara Txistulari Taldearen musikarekin edo albokaz Vanessa Ziaurritz, Oihana Irastortza eta Teresa Jareño hirukotearen musikarekin eta arin-arina trikitiaz Estanga anai-arrebak trikitilarien piezarekin dantzatuko dituzte. Aurten, hiru bikotek aukeratu dute alboka fandangoa dantzatzeko.
Lapurdi eta Nafarroa Behereko bost bikotek parte hartuko dute. Gipuzkoarrak izango dira gainontzekoak, eta bizkaitar bat ere lehiatuko da. Epaimahaia Euskal Dantzarien Biltzarreko bost adituk eta jantzi epaile batek osatuko dute, eta arlo teknikoaz gain, arlo artistikoa ere baloratuko dute txapelduna aukeratzeko. ETB1-en emango dute txapelketa larunbatean bertan, gaueko 22:00etan. Streaming bidez ere jarraitu ahal izango da, eitb.eus webgunean.
Bikote irabazleak Aitor Ruiz de Eginoren garaikurra, 800 euro, oroigarria, txapela, lepokoa eta Gipuzkoako Euskal Dantzarien Biltzarrak emandako trofeoa jasoko ditu, bigarrenak 600 euro eta oroigarria, eta hirugarrenak 500 euro eta oroigarria. Dantza jantzien saria, lurralde bakoitzeko saria eta Guillermo Areizaga lehenbiziko aldiz aurkezten direnen artean ongien sailkatu denaren saria ere banatuko dituzte.
Dantza ikuskizuna plazan
Bestalde, larunbat goizean, 12:30ean, Kimua Dantza Kolektiboaren genEroa dantza ikuskizuna izango da Segurako plazan, eta euria bada Laiotz herri eskolako patioan. Arratsaldean, berriz, txapelketako atsedenaldian eskainiko dute ikuskizuna, formatu laburragoan. Txapelketarako sarrera batzuk geratzen dira. Udaletxean edo bibe.me webgunean eskuratu daitezke.
45. Euskal Herriko Dantza txapelketako dantzariak
Bikotea Ordezkaturiko herria
· Xabi Dupuy-Xanti Eyherabide ………….. Beskoitze
· Enara Arrizabalaga-Iker Sarasua ………. Azpeitia-Azkoitia
· Irati Olaizola-Idoia Narbaiza ……………. Legazpi
· June Elorza-Eneko Sarasua ……………… Azpeitia-Azkoitia
· Itziar Bastida-Anaitz Lizartza …………… Azpeitia
· Saioa Galarraga-Julen Murgiondo ……. Bergara
· Elaia Elorza-German Aranburu ……….. Azpeitia
· Amaia Apezetxea-Idoia Salha ………….. Hendaia-Donibane Lohitzune
· Katerin Artola-Iker Belintxon ………….. Oiartzun-Lezo
· Marie Feyri-Battitt Etchart ……………… Bidart-Bidarrai
· Olatz Azkue-Mattin Etxebeste …………. Lezo-Oiartzun
· Maren Galvez-Gorka Granado …………. Lezo-Sopela
· Oihana Betelu-Pierre Latasa ……………. Baiona-Urruña
· Laura Bastida-Ekain Uzkudun …………. Azpeitia
· Oihana Dottax-Antton Barcos ………….. Ainhoa-Beskoitze
