Ping pong eta futbolin txapelketa asteburuan
Bele Gazte gaztelekuak abendura arteko ekintzen egitaraua osatu du. Azaroaren 6an, berriz, saskibaloi txapelketa jokatuko dute Zegamako gazteek.
Zegamako gazteak Sobrongo abentura parkean, udan. 
Zegamako Bele Gazte gaztelekuak urritik abendura egingo dituzten ekintzen egitaraua osatu eta zabaldu du. Asteburu honetan, hilaren 29an eta 30ean, futbolin eta ping pong txapelketa jokatuko dute gazteek, gaztelekuko ordutegian. Ostiraletan 17:00etatik 20:00etara egongo da zabalik, eta larunbatetan 16:30etik 20:30era. Azaroaren 6an, berriz, saskibaloi txapelketa jokatuko dute. Gozogintzan ere arituko dira hurrengo hilabetean, azaroaren 19an eta 20an gailetak eta txokolate beroa egingo baitituzte. Azaroko azken asteburua gabonetako programazio bileretarako baliatuko dute.
Abenduan sukaldaritza eta sormena landuko dute. Hemen abendurako aurreikusitako jarduerak:
- Abenduak 3: IX. Argazki Lehiaketako sari banaketa.
- Abenduak 4: Pizzak egitea.
- Abenduak 10-11: Antzerkigintza.
- Abenduak 17: Gabonetako apaingarriak sortzea.
- Abenduak 18: San Tomaseko txistor jatea.
