Kutxa Biraren dokumentala ikusgai, Berrian
Iparra Hegoa kultur elkarteak antolatutako 'Bizi gira...Kutxa Bira' egitasmoaren xehetasunak azaltzen ditu ikus-entzunezkoak, Gastibeltza Filmak ekoitzia.
Iparra Hegoa kultur elkarteak antolatutako ‘Bizi gira…Kutxa Bira’ egitasmoaren inguruko dokumentala Berrian dago ikusgai. Astelehen gauerdira arte ikusi ahalko da egunkariko webgunean. Martxoaren 20an ekin zion kutxak bidaiari Patagonian, eta maiatzaren 30ean iritsi zen Segurara. Dokumentalak bidaiaren nondik-norakoak azaltzen ditu 64 minututan. 80 herri zeharkatu zituen euskararen aldeko mezuak jaso zituen egurrezko kutxak, Argentinatik Euskal Herrira, auzolanari esker.
Irailaren 22an Seguran aurkeztu zuten dokumentala, eta ondoren kutxa bera Ardixarra etxean jarri zuten ikusgai. Urriaren 1ean, berriz, Legazpiko zine denboraldia ireki zuen Kutxa Biraren dokumentalak. Gastibeltza Filmak ekoiztetxeak ekoitzitako lana da.
