Feminismoa landuko dute gaztelekuko nerabeek aisialdiaren bitartez
Edukiak modu transbersalean eta informalean landuko dituzte. Zegamako gazteak feminismora hurbiltzen hastea eta kontzientzia sortzea dira ekimenaren helburuetako batzuk
Zegamako Belegazte gaztelekuan feminismoa landuko dute nerabeek. Adinka banatuta, martxoaren 25etik apirilaren 12ra bitartean gaia jorratzeko bi saio egingo ditu talde bakoitzak. Bihar, gaztelekuan bilduko dira gazte zein koordinatzaile, nerabeei proiektua aurkezteko. Eihera kooperatibak garatuko du prozesua. Feminismoa aisialdiaren bidez modu transbersalean eta informalean landuko dute.
Bost helburu nagusi zehaztu dituzte: Zegamako gazteak feminismora hurbiltzen hastea, indarkeria matxistaren inguruko kontzientzia sortzea, gazteak herrian eraldaketarako subjektu bilakatzen hastea, feminismoa herriko gazteen arazoetatik lantzea eta feminismoa eta aisia uztartzea. Besteak beste, genero rolen eraikuntza, maitasun erromantikoa, homofobia, sare sozialak eta indarkeria matxista edota autodefentsa feminista izango dira lanaren oinarriak.
Eiherak prozesurako ondutako dokumentuan azaldu du herri feminsta bat martxan jartzeko «ezinbestekoa» dela «eraldaketarako klabe eta subjektu direnak idenfitikatzea». Zegaman gaztelekuko nerabeak izango dira xede taldea, «lanketa bat abiatu eta haiek eraldaketarako subjektu bilakatu ahal izateko». Nerabeen kezken arabera moldatuko dituzte saioak, «haien interesak ezagututa diseinu erreal eta dinamikoago bat egin ahal izateko».
Pintxo lehiaketa etzi
Gaztelekuko ekintzen egutegiari dagokionez, berriz, pintxo lehiaketa eta Aste Santuko ekintzen programazio bilera izango dute gazteek larunbatean, 16:30etik 20:30era.
Egutegi proposamena
Martxoak 25. DBH1 taldearen saioa, 16:00etatik 18:00etara. DBH2-koen saioa 18:00etatik 20:00etara.
Apirilak 1. DBH3-koak 16:00etatik 18:00etara. DBH4 eta batxilergokoak 18:00etatik 20:00etara.
Apirilak 11. DBH1-ekoak 16:00etatik 18:00etara. DBH2-koak 18:00etatik 20:00etara.
Apirilak 12. DBH3-koak 10:00etatik 12:00etara. DBH4 eta batxikoak 12:00etatik 14:00etara.
