Argi Berri Sariak zabalduko du, igandean, Osinalderako bidea
Sei bertsolari gazte izango ariko dira Herri Antzokiko oholtza gainean eta bi sailkatuko dira Osinalderako. Ikus-entzuleentzat doakoa da, baina txartela aurrez hartu behar da.
Beste urtebetez bueltan dira bertsolari gazteentzako lau sariketak Goierrin. Horietako lehena, Argi Berri Saria, igandean, hilak 27, Ordizian izango da. Oholtza gainean —24. jardunaldi hau ere iaz bezala Ordiziako Herri Antzokian egingo baitute—, sei bertsolari: Ane Zuazubiskar (Arrasate), Oihana Arana (Eskoriatza), Andoni Mujika (Urnieta), Maide Garmendia (Zaldibia), Haizea Arana (Eskoriatza) eta Iker Ormazabal (Hernani) izango dira. Antzokira gerturatzen den publikoak erabakiko du aurtengo Argi Berri sariketako irabazlea, eta Txikia garaikurra eramango du.
Argi Berri saria Osinalde sariketaren kanporaketetako bat denez, sei bertsolaritik bik lortuko dute Gabiriako finalerako txartela. Nortzuk izango diren, igandean argituko da.
Bitartean, jakin, sarrera doakoa izango dela baina antolakuntzak iragarri duela 11:30etik aurrera antzokiko leihatilan txartela hartu beharko dela.
Hurrengo saioak
Ondoren, astebete geroago, apirilaren 2an, Aztiri Sariak jarraituko dio, beste sei bertsolarirekin. Aurten ere Legazpin jokatuko da, Latxartegi aretoan, 17:00etan.
Hirugarren eta azken kanporaketa Zaldibian egingo dute, apirilaren 9an, Herri Antzokian 17:00etan. Handik aterako dira Gabiriako Osinaldeko finalerako faltako diren azken bi bertsolariak.
50. ena, bertso afaria
Hiru kanporaketetan sailkatutako bertsolariak, apirilaren 23an Osinalde Sarian, Gabirian, lehiatuko dira. Aurtengoa gainera, urteurren borobila izango da; sariketak 50 urte beteko baititu. Data borobila, eta bertso-afari formatuan egingo dute berriro. Iaz, elizan ospatu baitzuten. Aurten beraz bai, afal osteko girotxoaz gozatzeko saioa izango da Osinaldekoa.
OSINALDE SARIKETA – KANPORAKETAK
ARGI BERRI SARIA
Martxoak 27, Ordizian. Herri Antzokian, 12:00etan hasita.
Bertsolariak: Ane Zuazubiskar (Arrasate), Oihana Arana (Eskoriatza), Andoni Mujika (Urnieta), Maide Garmnedia (Zaldibia), Haizea Arana (Eskoriatza) eta Iker Ormazabal (Hernani).AZTIRI SARIA
Apirilak 2, Legazpin. Latxartegi aretoan, 17:00etan hasita.
Bertsolariak: Bittor Altube (Abadiño), Aner Peritz (Zarautz), Ekhiñe Zapiain (Bera), Irati Alcantarilla (Urruña), Unai Izagirre (Azkoitia) eta Urko Arregi (Oñati).OSINBERDE SARIA
Apirilak 9, Zaldibian. Herri Antzokian, 17:00etan hasita.
Bertsolariak: Asier Salcedo (Portugalete), Xabat Ilarregi (Leitza), Lierni Rekondo (Lasarte), Aitor Ugarte (Aramaio), Lurdes Ondaro (Munitibar) eta Aitor Tatiegi (Oñati).
