Dantzari Txikiak plazara
Goierriko Dantzari Txikien lehen juntadizoa Zaldibian egingo dute, igandean. Goierriko herri askotan berreskuratuko dute, ekainera arte. Idiazabalen, dantzari helduen topaketa dute bihar.
Zaldibian ospatuko dute, igandean, Goierriko urteko lehendabiziko Dantzari Txiki eguna. Duela hiru urte egin ziren azkenekoak, eta COVID-19ak etenarazi zituen 2020an eta 2021ean. Oraindik nabarituko da izurritearen eragina, ordea. Bazkaririk ez diete emango haur dantzariei, eta festa eguerdian, bazkal aurretik bukatuko da.
Iztueta dantza taldeak antolatutako festa, gainera, Zaldibiako 30. juntadizoa da.Bost talde ibiliko dira herriko kaleetan barrena. 11:00etan elkartu, eta hamaiketakoa jango dute lehenengo. Desfilea 12:00etan hasiko da, eta dantzaldi bateratua 13:00etan. Ordubietan bukatuko da Dantzari Txiki eguna.
Zaldibiako Iztuetako neska-mutilez gain, Ibarrako Alurr, Ordiziako Amets Bide, Beasaingo Aurtzaka eta Legorretako Irrintzi Alai gonbidatu dituzte.
Idiazabalen, helduak bihar
Ez da Zaldibiakoa izango asteburuan Goierrin egingo den dantzarien festa bakarra. Idiazabalen, bigarren aldiz, Goierriko Dantzari Helduen Topaketa egingo dute, bihar. Lehenengo topaketa 2019an izan zen, Lazkaon. Jarraipena emateko erabakia hartu dute, eta Idiazabalen elkartuko dira dantzari taldeetako helduak. Korrika Kulturalaren barruan sartu dute.
Goierriko sei herritako 100 dantzari heldu baino gehiago bilduko dira, talde hauetakoak: Irrintzi Alai (Legorreta, Oin Arin (Lazkao), Axari (Idiazabal), Lurra (Urretxu), Otsoak (Ataun) eta Amets Bide (Ordizia).
Idiazabalgo plazan 10:30ean batu, eta desfilea 11:00etan hasiko dute. Plazako alardea 13:00etan egin, eta 14:30ean bazkaria dute. 16:30ean, Ttipika taldearekin erromeria izango da.
DANTZARI TXIKI EGUNAK GOIERRIN 2022AN
Igandea, apirilak 3. Zaldibia.
Maiatzak 8. Legorreta.
Maiatzak 15. Ordizia.
Maiatzak 15. Zumarraga.
Maiatzak 22. Beasain.
Maiatzak 22. Ataun, San Gregorio auzoan.
Ekainak 5. Legazpi.
Ekainak 19. Lazkao.
DANTZARI HELDUAK
Bihar, apirilak 2. Idiazabalen, Goierriko Dantzari Helduen II. Topaketa.
