Mutiloa-Ormaiztegi Bide Berdearen 13. Eguna ospatuko da larunbatean
Clara Gutierrez biologo eta etnobotanikan adituak ibilaldi gidatua egingo du. Liernitik abiatuko dira 09:30ean. 'Ondareari begira' aldi baterako erakusketa ekainaren 12ra arte dago ikusgai
Mutiloa-Ormaiztegi Bide Berdearen Eguna izango da larunbatean, Zumalakarregi Museoak antolatuta, Ormaiztegiko Udalarekin, Mutiloako Udalarekin eta Goiturrekin elkarlanean. 13. edizioa izango da. Bide berdetik mahaira lelopean ibilaldi gidatua eta gastronomiaren inguruko tailerra egingo dute parte hartzaileek. Liernitik abiatuko dira 09:30ean, eta 5 kilometroko ibilbidea osatuko dute.
Clara Gutierrez biologo eta etnobotanikan adituaren eskutik, Barnaolara joango dira, bertatik Troi Bidera, Mutiloara iritsi arte. Mutiloa bidean bildutako landareekin tailer gastronomikoa eta dastaketa egingo dute, eta 15:30ean itzuliko dira Liernira. Partaide kopurua mugatua da eta dagoeneko leku guztiak beteta daude.
Iriarte erdikoa
Bestalde, Zumalakarregi Museoak beste pieza bat jarri du ikusgai abuztura arte, Musealiak proiektuaren barruan, Iriarte Erdikoa baserria Zumalakarregi general karlistaren jaiotetxea modura aurkezten duen koadroa, alegia. Ikatz-marrazkiz egina, Gregorio Hombrados tolosarrak egin zuen 1925ean. Ormaiztegi erdian dagoen aipatutako baserria agertzen da koadroan, gaur egun Zumalakarregi Museoa dena. Museoak jakinarazi duenez, Zumalakarregi ez zen bertan jaio, baina bere familiarekin bertan kokatu zen XVIII. mende bukaera aldera.
Ondareari begira aldi baterako erakusketa, aldiz, ekainaren 12ra arte egongo da ikusgai. Izen bereko argazki lehiaketaren zazpi edizioetan jasotako 600 argazki baino gehiagoren artean 21 argazki aukeratu dituzte erakusketa osatzeko.
Museoen Nazioarteko Eguna Igartubeitin
Maiatzaren 18an Museoen Nazioarteko Eguna ospatuko da. Igartubeiti Baserri Museoak ate irekien jardunaldia antolatu du egun horretarako. Maiatzaren 21ean eta 22an, berriz, bi tailer egingo dituzte: ehungintza familia tailerra, bata, eta jasangarritasuna lantzeko helduentzako tailerra, bestea. Aurrez izena eman behar da museora deitu edo idatzita.
