Beitia martxaren 24. edizioa egingo da igandean Urretxu eta Zumarragan
Antolatzaileek 31,5 kilometroko ibilbidea prestatu dute. Mendizaleek Oñamendiko postontzia ezagutzeko aukera izango dute. Irteera 07:00etatik 07:30era izango da
Igandean Iñaki Beitiaren omenezko mendi martxaren 24. edizioa egingo dute Urretxun eta Zumarragan. Irteera 07:00etatik 07:30era izango da, Areizaga-Kalebarren plazan. Antolatzaileek 31,5 kilometroko ibilbidea prestatu dute. Desnibela 1.700 metrokoa da.
Ibilaldia Goierri, Deba Garaia eta Urola Kosta eskualdeetatik igarotzen da. Mendizaleak Eitza aldera abiatuko dira. Soroitz, Saltsamendi eta Berroeta baserrietatik pasa ondoren, Izazpira (kontrola) igoko dira. Pagotxoeta-Samiño kordaletik Oñamendiko postontzi berria bisitatuko dute (kontrola). Oletatik Aizpurutxora jaitsiko dira (anoa postua eta kontrola). Berriro ere aldapa gora Elosuraino, Gorlatik Trekutz aldera (anoa postu likidoa) eta Irimo gailurretik (kontrola) Areizaga-Kalebarren plazara itzuliko dira.
Oñamendiko postontzia
Berrikuntza nagusia Oñamendi gailurrean egongo da: mendizaleek bertako postontzia ezagutzeko aukera edukiko dute. Iaz inauguratu zen, Beitiaren heriotzaren 25. urteurrenean.
Ibilbidea bukatutakoan, parte hartzaileek mendiko materialaren zozketan sarituak izan diren egiaztatu ahal izango dute. Zozketarako produktuak bertako dendekin elkarlanean erosi dira (Intersport, Alex Kirolak eta Bidegorri).
Kanpotik etorritako mendizaleek bi aparkaleku berezi izango dituzte: bata Urretxuko lizeoan egongo da eta bestea Zumarragako La Salle-Legazpi ikastetxean.
Internet bidezko izen-ematea maiatzaren 2an aktibatu zen. Izena aurrez aurre eman nahi dutenek, Urretxuko Aldiri kiroldegira eta Zumarragako Ispilla kiroldegira jo dezakete. Baita Ostadar mendi taldearen egoitzara ere. Ostadar mendi taldearen egoitza Zumarragako kultur etxean dago eta astearte, ostegun eta ostiral arratsaldean egoten dira bertan. Aldez aurretik izena ematen dutenek 8 euro ordainduko dute eta igande goizean Areizaga-Kalebarren plazan izena ematen dutenek 10 euro. Antolatzaileek izena aurretik ematea eskatu dute.
