Moto topaketa egingo dute larunbatean Idiazabalen
Euskal Aker Goiherri Bikers motorzaleen taldeak antolatuta, moto topaketa egingo dute larunbatean. Bazkariko txartelekin lortutako dirua Katxalin elkartearentzat izango da.
Motor hotsak entzungo dira larunbatean Goierrin. Euskal Aker Goiherri Bikers motorzaleen taldeak antolatuta, moto topaketa egingo da Idiazabaldik abiatuta. Bertan elkartuko dira, eta eskualdean barrena ibiliko dira goizean motorzaleak haien motorrekin. Ondoren Idiazabalera itzuliko dira eta bertan jango dute elkarrekin. Bazkariko txartelekin lortutako dirua Katxalin elkartearentzat izango da.
Taldeko kideak 08:00ak aldera elkartuko dira Idiazabalen topaketa prestatzeko. 10:00etan izango dute hitzordua, eta 10:30ean ibilbideari ekingo diote. Ormaiztegiko Itxune tabernan geldialdia egingo dute, eta 13:00etan txikipoteoa. Idiazabalera itzuliko dira gero eta 14:00etan bazkaria izango dute. Paella prestatuko dute. Bazkari solidarioa izango da, txartelekin lortutakoa Katxalin minbiziagatik eragindako Gipuzkoako emakumeen elkartera bideratuko baitute. Bazkalondoren, produktu ezberdinak zozkatuko dituzte bazkariko sarrerako zenbakiekin, eta jolasak egingo dituzte. Eguna amaitzeko, Anonimos Rocanrrol eta Zikins Party taldeen kontzertuak egongo dira plazan bertan.
Bazkarirako txartelak
Edonork parte har dezake bazkarian. Idiazabalgo zenbait dendetan jarri dituzte salgai sarrerak, eta larunbatean plazan bertan ere erosi ahal izango dira. Motorrak eta rokanrola gustuko duten herritarrek larunbatean izango dute aukera giro horretan gozatzeko.
