Ostegunean irekiko dute Agirre-etxeberriko taberna berria
Sabin Agirreburualdek hartu du bere gain zerbitzua. Bi urteko kontratua izango du. Inaugurazioan Alaitasuna errondaillak joko du.
Legazpin ostalaritzaren munduan oso ezaguna den Sabin Agirreburualdek hartuta, ostegun arratsaldean abiatuko du bere ibilbidea udalaren jabetzako Agirre-etxeberri etxeko taberna-kafetegi berriak. Agirreburualdek datozen bi urteetan kudeatuko du taberna-kafetegi hori, eta beste bi urtez luzatu ahal izango du kontratua.
Pintxoak, ogitartekoak, tostadak, errazioak, eguneko menua eta ostiraletan menu berezia eskainiko ditu. Ordutegia hau izango da: astelehenetik ostegunera, 07:30etik 20:00etara; ostiraletan o7:30etik 22.00etara; larunbatetan 10:00etatik 14:00etara; eta igande eta jai egunetan itxita.
Legazpiko Udalak bost aldiz atera du taberna-kafetegi honen kontratazioa.
Inaugurazioan, errondailla
Inaugurazio ekitaldia ostegunean 19:00etan izango da, eta Alaitasuna Errondailak emanaldi labur bat eskainiko du.
