Dantzan agurtu dituzte jaiak San Gregorio auzoan
Otsoak Dantza Taldeak eman die agurra San Gregorioko jaiei. Auzoan zehar emanaldia egin dute txikienetatik hasi eta helduenetarako dantzariek, herria musikaz eta dantzaz alaituz jaietako azken arratsaldean.
Ataungo San Gregorio auzoko jaiak iritsi dira amaierara eta agurra ezinhobe eman diete Otsoak Dantza Taldeko dantzariek. Auzoan zehar emanaldi bat eskaini dute adin desberdinetako dantzariek, bakoitzak bere mailako dantzak eginez eta arratsaldepasa polita eskainiz herritarrei. Dantzarik sinpleenetatik konplexuenetara ikusi ahal izan dira gaurkoan Ataunen, baita dantza bereziren bat ere. Giro aparta sortu dute auzoan eta musika eta dantzaren bitartez eman diete agurra jaiei. Arratsaldeko 18:00etan hasi da emanaldia eta plazan eman diete amaiera, arratsaldeko 19:00ak aldera, arin-arina eta kalejira eginez guztiek elkarrekin.
