Urola Garaiako Jabetze Eskolak hasi du ikasturtea
Udazkenerako ikastaro eta tailerren eskaintza kaleratu du. Izen-ematea irekita dago.
Batukada feminista da tailerretako bat Batukada, xilografia eta antzerkia dira Urola Garaiko Berdintasun Arloak antolatuta, Jabetze Eskolak datozen asteetan eskainiko dituen tailer eta ikastaroetan landuko dituzten gaietako batzuk. Jabetze Eskolan hasi da dagoeneko ikasturte berria.
Urola Garaiko Jabetze Eskola 2012tik dago martxan, eta orduz gero jarduera eskaintza zabala prestatzen du 16 urteko emakumeei zuzenduta. Ikastaro edo tailerrak doakoak dira, baina parte hartzeko izena eman behar da aurrez 943 25 23 89 telefono zenbakian edo
jabekuntzaeskola@gmail.com helbide elektronikoan.
Udazkenerako eskaintza
Ikasturte berriko udazkenerako eskaintza prest du dagoeneko Jabetze Eskolak, eta hainbat tailer eskainiko ditu.
Batukada feminista izango da lehena. Ezkioko pilotalekuan emango du Ainara Sarasketak, hilaren 28an, urriaren 19an, azaroaren 2an, 16an eta 30ean eta abenduaren 21ean, 18:00etatik 20:00etara.
Xilografia tailerra ere izango da, eta Oihana Ugartek emango du urriaren 5ean, 19an eta 26an, azaroaren 2an, 9an, 16an, 23an eta 30ean eta abenduaren 14an, 18:00etatik 20:00etara.
Ikasturte berrian Emakumeak mugimenduan tailerra emango du berriz Oihane Vicentek urriaren 7an, 14an, 21ean eta 28an, azaroaren 4an, 11n, 18an eta abenduaren 2an eta 16an, 09:30etik 11:00etara.
Elikadura kontzienteari buruzko tailerra ere eskainiko du Jabetze Eskolak. Mirian Herbonek emango du urriaren 8an eta 22an, 10:30etik 18:30era, Legazpiko Emakumeen Etxean.
Antzerki feminista tailerra ere izango da, urriko eta azaroko astearteetan eta abenduaren 12an, 18:00etatik 20:00etara, Belen Nevadok dinamizatuta.
Amaitzeko, jabetzeari berari eskainitako ikastaroa ere antolatu dute. Empoderamiento si, pero … ¿Como usamos nuestro poder? izenburua du, eta Leticia Urretabizkaiak emango du, urriaren 6an eta 20an, azaroaren 3an eta 17an, abenduaren 1ean eta 15ean eta hurrengo urteko urtarrilaren 12an eta 16an, 18:00etatik 20:00etara.
Batukada eta elikadurari buruzko ikastaroak kenduta, gainerakoak Urretxuko Pagoetako auzoan dagoen Emakumeen Etxean emango dituzte.
Talde finkoak
Ikastaro eta tailer horiez gain, Jabetza Eskolak talde finkoak ere baditu, Pagoetako lokalean biltzen direnak: Envejecer bonito, Zaintzaile emakumeen taldea, Emakume musulmanen ahalduntzea eta alfabetatzea, Sua emakume migranteen taldea eta Gure burua maitatuz. Talde irekiak dira guztiak.
