Larunbatean ospatuko dute ormaiztegiarrek San Migeletako festa
Patata tortilla lehiaketarako eta herri afarirako osteguna baino lehen eman behar da izena.
San Migel eguna irailaren 29an da. Egun horren bueltan, asteburu bat lehenago ospatuko dute San Migeletako festa eguna ormaiztegiarrek. Larunbaterako hainbat kultur jarduera antolatu ditu udalak Ormaiztegiko Guraso Elkartearen, Zumalakarregi Museoaren, Gipuzkoako Foru Aldundiaren eta Angel Elorzaren kolaborazioarekin, haurrentzat zein helduentzat. Goizean hasi eta iluntzera arte iraungo du ospakizunak.
9:00etan 26. mendi bizikleta proba izango da. Izen-ematea egunean bertan egingo da, 8:15etik aurrera, udaletxean. Amaieran, hamaiketakoa egongo da eta opariak zozkatuko dituzte. 30. San Migel toka txapelketa herrikoia ospatuko da aurten. 11:45ean hasiko da, Gizarte Etxean, eta 12:15 arte egongo da izen-ematea irekita. Ondoren, Berjaldegin, 26. harrikalari txapelketa herrikoia jokatuko da. Borja Irizarrek 28,95 metroko markarekin dauka errekorra, eta Amaia Eskisabelek 12,55 metroko markarekin.
Bazkalondoren jarraituko du festak, 16:00etan eliz-atarian jokatuko den 30. San Migel Mus txapelketa herrikoiarekin. Izen-ematea 15:00etatik 15:45ak arte egongo da zabalik. Bikoteko 10 euro ordaindu behar dira. Irabazleek txapela, garaikurra, afaria eta bildutakoaren %50 jasoko dute, bigarrenek garaikurra, gazta eta bildutakoaren %30, eta hirugarrenek ardo kaxa eta bildutakoaren %20. Bitartean, 16:30ean futbol3 partidak jokatuko dira Urbeltz zelaian. Izen-ematea 16:00etan izango da.
14. San Migel patata tortilla lehiaketan parte hartzeko izena osteguna baino lehen eman behar dute interesa dutenek, kultura@ormaiztegi.eus helbidean. 17:45ean hasiko da lehiaketa, Arbolarin. Irabazleek Kukon afaria, mantalak eta odolki eguneko epaimahaikide izateko aukera jasoko dute. Afari herrikoirako ere izena eman behar da osteguna baino lehen. Tiketak 4 euroan daude salgai Ormaiztegi App-an, osteguneko 20:59ak arte.
Aurtengo San Migel Ospakizunen aurrekontua 10.000 eurokoa izan da. Jardueren zerrenda:
-Irailak 24, larunbata.
- 9:00. 26. mendi bizikleta proba.
- 10:30. Haurrentzako jokoak eta hamaiketakoa Gizarte Etxeko belardian. Euria egiten badu, karpan.
- 11:45. 30. San Migel Toka Txapelketa Herrikoia Gizarte Etxean.
- Ondoren. 26. Harrikalari Txapelketa Herrikoia.
- 12:00-14:30 eta 19:00-21:00. Otso eta Ale dultzainero taldea.
- 16:00. 30. San Migel Mus Txapelketa Herrikoia eliz-atarian.
- 16:30. Futbol3 Urbeltzen.
- 17:45. 14. San Migel patata tortilla lehiaketa Arbolarin.
- 21:00. Afari herrikoia karpan.
- Jarraian. Benta Zaharreko Mutiko Alaiak taldearekin kale animazioa.
