Astronomia gaua egingo dute Oiangun
Bi ekintza egingo dituzte; arratsadean, 'Nork esan du hemen ez direla izarrak ikusten?' tailerra egingo dute, eta iluntzean, zeruko behaketa.
Larunbatean elkartuko dira Oiangun. Astronomia gaua egingo dute larunbatean, urriak 1, Ordiziako Oiangu parkean, Aranzadi Zientzia Elkarteko kideen laguntzarekin.
Arratsaldean, 18:00etan hasita, Nork esan du hemen ez direla izarrak ikusten? tailerra egingo dute. Bertan, konstelazioak zer diren eta zeintzuk diren ikasteko aukera izango da, eta planisferio bat eraikiko dute euritako batean. Doakoa da, baina 30 pertsonentzako tokia izango denez, komeni da aldez aurretik izena ematea. Ordu eta erdiko iraupena izango du.
Iluntzean berriz, behaketa egingo dute. Izarrak, konstelazioak, ilargiaren kraterrak, eta Marte, Saturno eta Jupiter planetak ikustea espero dute. 20:30ean hasiko dira behaketarekin.
Astronomia gaua egin ahal izateko eguraldi aproposa egitea komeni da. Egoera metereorologikoak ez badu laguntzen, posible da bertan behera geratzea.
