Txolartekoek beasaindarrei dantzarako gonbita egin diete
Atzegikoek dantza emanaldia antolatu dute, boluntarioen egunaren harira. Beasaindarrak alboan nahi dituzte. Ikusgarritasuna eta inklusioa aldarrikatuko dituzte
Dantzan arituko diren Atzegiko gazteak, entsegu baten / Atzegi Atzegiko gazteek beasaindarrak dantzara aterako dituzte. Bihar, boluntarioen egunaren bueltan, dantza emanaldia antolatu dute 12:00etan, Erauskinen. Baina herritarrak ikusle izan beharrean dantzari izatea nahi dituzte. Hau da, alboan egotea. «Berdina egin dezaketela erakutsi nahi dugu, gizartean bat gehiago direla. Horregatik, herritar guztiak beraiekin batera dantza egitera animatzen ditugu», aipatu Gorettik, antolatzaileetako batek.
ETSren Aukera berriak eta Pirritx, Porrotx eta Marimototsen Pausoka pausoka abestiei jarri diete koreografia. Ez dira alitzira hautatutako bi abesti, norberaren garapen pertsonalaz, ametsez, batasunaz… diarduten abestiak direlako. Apirilean hasi ziren entseguekin. «Hasieran lotsati xamar hasi ginen. Baina orain Whatsapp taldean etengabe ari gara galdezka ea entsegurik badagoen», aipatu du Gorettik. Biharko ezin gogotsuago daude, beraz.
Norbaitek etxeko lanak aurreratu eta koreografiak ikasi nahi baditu, asegidako bideo honek lagunduko dio. Gainerakoentzako, monitore batek gidatuko ditu gerturatutakoen oinak. Gogoen eta eguraldiaren arabera, dantza emanaldia luzatu egingo dute.
Gorettik gaineratu du ikusgarritasuna ere jorratu nahi dutela. Atzegiko gazteek aukera gutxi izaten dituzte plazara irteteko eta protagonistak izateko.
Boluntarioen eguna
Boluntarioen eguneko festa 10:00etan hasiko da. Alkoholiko anonimoak, Alanon, Nagusilan, Atxipi, Atzegi, Caritas, Asmube, Herriak Elkarlanean, Minbiziaren aurkako elkartea eta Gurutze Gorria elkarteek hartuko dute parte. Bakoitzak postu bat izango du, euren jarduna azaltzeko eta boluntario sarean indartzeko.
11:15ean batukada taldeak giroa piztuko du. 12:30ean Gurea abesbatzak emanaldia eskainiko du. Amaitzeko, danak elkarrekin mokadu bat jatera joango dira, Urbiberri gizarte etxe berrira. Bidezko merkataritzako produktuak salgai egongo dira, 13:30era arte.
