Ander Altunak Invictus gerrikoa irabazi du Ficoban
Larunbateko Motor Kick Fest jaialdian jokatu den arte martzial mistoen txapelketa irabazi du.
Ander Altuna Polite legazpiarrak Invictus txapelketako gerrikoa jantzi du asteburuan, Irungo Ficoban ospatu den Motor Kick Fest jaialdian. Musika, motorrak eta kontaktu kirolak elkartzen zituen jaialdia zen.
Altunak Arte Martzial Mistoen (MMA) txapelketan parte hartu zuen larunbatean, 93 eta 120 kilo arteko kategorian. Hiru borrokaldi egin zituen, eta hirurak irabazi zituen, Invictus gerrikoa eskuratuz. “Oso gustura” dago Altuna irabazitako gerrikoarekin, baina hiru konbateekin “oso egun luzea” izan zela azaldu du. Hala ere, asko disfrutatu zuela aitortu du, lagun asko joan zirelako bera borrokan ikustera.
Orain atseden hartuko duela dio borrokalariak, eta “Gabonetaz gozatu”. Laster hasiko da aurten irabazi duen Espainiako MMA txapela defendatzeko txapelketa prestatzen, eta “nork daki, agian Europako txapelketara ere joango naiz”.
Irudian, Ander Altuna, Lucia amarekin.
