Ia mende erdia beteta amaitu da
Santa Ana Abesbatzak aktibitatea amaitu du, igandean azken kontzertua eman ondoren. Oraingo taldeak jarraituko ez duen arren, gazteak animatu dituzte erreleboa hartzera.
Ordiziako Santa Ana Abesbatzak azken kontzertua eman eta urte luzeko aktibitatea eten du. Ez dute jarraituko orain arteko koral taldearekin. 1950. urtean sortu zen Santa Ana Abesbatza, eta 16 urte aktibo egon ondoren, 13 urteko etenaldia egon zen. 1979an eratu zuten berriro taldea Santa Ana abesbatzari jarraipena emateko, eta gaur egunera arte aktibo egon dira, 43 urtez. Garai batean gertatu bezala, beste talde batek lekukoa hartzea espero dute.
1950etik 1966ra iraun zuen Santa Ana Abesbatzako lehenengo formazioak. Gaur egungo taldeak 1979an hartu zuen erreleboa, Javier Ormazabal apaiza izandakoak sustatuta. «13 urtez ez zen koral talderik egon. Kide ohiei zein berriei deialdia egin zitzaien eta horrela hasi genuen bigarren bidea. Ni neu orduan hasi nintzen», azaldu du Inma Goiburu Santa Ana Abesbatzako zuzendariak.
Bigarren ekinaldi horretako lehenengo 25 urteetan «oso aktibo» ibili zen abesbatza, 1979 eta 2004 artean, eta Euskal Herrian, iberiar penintsulan, Europan zein Amerikan izan ziren kantatzen. «Beste herrietako abesbatzekin harremandu ginen, haiek etortzen ziren eta gu joaten ginen, urtean bidaia bat edo bi egiten genuen». Erroman (Italia), Batikanoan abestu zuten, San Pedro basilikan, eta baita Mendozan, Buenos Airesen eta Villa Mercedes-en (Argentina) ere. Villa Mercedes-en, euskal etxearen inaugurazioan parte hartu zuten. «Hunkigarria izan zen 3. belaunaldiko jendea abestiekin hunkituta ikustea».
«Erabaki zaila»
Ibilbideko lehen mende laurden hartako jarduna oso altua zenez, beste modu batean enfokatzeko beharra plazaratu zuen taldeak 2004 inguruan. «Momentu hartan non ginen planteatu genuen, eta aktibitatea jaistea erabaki genuen. Horrela iraun dugu beste 17 urte». Orain, azken kontzertua emanda, aktibitatea eten dute. «Kosta» egin zaie, eta «erabaki zaila» izan da taldeko kideentzat. Abesbatzari eskaini beharreko denbora eta lana, baina, «oso exijentea» dela azaldu du zuzendariak, eta taldeko kideak «bizitzako momentu ezberdinetan» daudela hori aurrera eraman ahal izateko.
«Koralak eskatzen du astero entseatzea, gehiago kideek musika ikasi behar dutenean, entzumenez». Batzuk erretiroa hartuta daude, beste batzuk familia hazten… «Bizitzako momentu eta prozesu ezberdinetan gaudenez, egoerak ez digu uzten proiektu potolo bat aurrera eramaten, eta horrelako talde bat ilusioarekin mantentzeko proiektu potolo bat behar da».
«Penaz» amaitzen dute, urte askoko ibilbidea izan delako. Igandekoa azken kontzertua izan dela esatea ere oraindik kosta egiten zaie. «Baina nik uste dut ondo gaudenean joan beharra daukagula».
Igandean egin zuten azken emanaldia Andre Mari Jasokundea parrokian, Gabonetako kontzertuan.
Etorkizun hurbilean
Santa Ana Abesbatza gisa aktibitatea amaitu duten arren, harremana izaten jarraituko dute. «Santa Ana ez da aktibitatea bakarrik. Familia bat bezala gara, kide asko hasieratik gaude, eta beste asko aspaldidanik». Garai batean gertatu zen bezala, «etorkizun ez urrun batean» Santa Ana Abesbatzak jarraipena izatea espero dute, beste talde batekin bada ere. 1950ean sortutako lehenengo formazioaren ondoren eta 1979an sortutako bigarren formazioaren ondoren, hirugarren formazio bat ere eratzeko esperantza dute.
Gazteak animatu dituzte erreleboa hartzera. «Espero dugu hurrengo belaunaldiak testigua hartzea, eta ezaugarri berriak ematea marka honi, Santa Ana Abesbatzari».