Ibilgailua partekatuz kilometro gehien egiten dutenek saria izango dute
'Goazen elkarrekin' erronka abiatu du Beasaingo Udalak, eguneroko desplazamenduetan ibilgailua partekatzea sustatu eta CO2 isuriak murriztu eta erregaia aurrezteko helburuarekin.
Duela bi hilabete jarri zen abian ParteCar ekimena, herritarrei antzeko mugikortasun errutinak dituzten pertsonekin harremanetan jartzeko aukera ematen duena, eta Beasaingo Udalak emandako datuen arabera, «110 erabiltzaile baino gehiago» erregistratu dira aplikazioan. Ekimena martxan jarri zenetik, eguneroko joan-etorrietan autoa partekatuz, CO2 isuriak murriztu direla nabarmendu du Beasaingo Udalak, ekimenaren sustatzaileak.
Isurpen kutsagarriak murrizten jarraitzeko helburuarekin, ParteCar ekimenaren barruan, Goazen elkarrekin goiburupean, erronka bat proposatu du Beasaingo Udalak. Biztanleria guztiari zuzendutako erronka bat da; 2023 urteko urtarrilaren 31a baino lehen 2.500 kg CO2 gutxiago isurtzea ingurumenera, autoa partekatuz.
Erronkan parte hartzeak saria izango du. Erronka amaitzean ekitaldi berezi bat egingo dute, partaideen arteko gosaria eginez eta emisioak murrizten gehien lagundu duten gidariari eta bidaiariari sari berezi bat emango diete; bi lagunentzako gau bateko egonaldia hotel batean.
Erronkan parte hartzeko hoopcarpool.com/goazenelkarrekin/ webgunean sartu behar da. Komunitateko kide izateko eta eguneroko desplazamenduetan autoa partekatzeko, ParteCar Hoop Carpool aplikazioa deskargatu eta bertan erregistratu behar da, BEASAIN22N kodea sartuta. Kontutan izan behar da, abiapuntua edo helmuga Beasain duten joan-etorrietarako dela.
Aurrezpena
Joan-etorrietan autoa partekatuta, ingurumenari onura egiteaz gain, badu beste abantaila bat, erabiltzaileen poltsikoetan eragina duela, izan ere erregaien igoerari aurre egiteko aukera bat zabaltzen du. Beasaingo Udalaren kalkuluen arabera, «3.500 euro inguru aurreztu dira erregaietan». Beasain abiapuntu edo helmuga duten bidaiek %50eko diru laguntza jasotzen dute aldi batean —gehieneko prezioa ibilbide eta bidaiari bakoitzeko 3 euro—.