Xalo arropa denda erakusleihoen lehiaketan garaile
Xalo arropa denda izan da aurtengo Gabonetako Erakusleiho Lehiaketako garailea. Bigarrena Andreak arropa denda eta hirugarrena Kux-Kux haurren arropa denda.
Gabonak gerturatu eta Beasaingo merkatariak haien erakusleihoak apaintzen hasten dira, data horretara egokituz. Denetariko erakusleihoak ikusi ahal izaten dira Beasaingo kaleetan eta hauetako gehienek Gabonetako Erakusleiho Lehiaketan parte hartzen dute. Lehiaketa hau urtero Gabonetan egiten den lehiaketa da eta Beasaingo Bareak Merkatari Elkarteak antolatzen du, Beasaingo Udalaren eskutik. Aurtengoa ere ez da gutxiagorako izan, hainbat izan baitira parte hartu dutenak erakusleiho lehiaketan. Hala ere, parte-hartzaile guztietatik hiruk bakarrik eskuratu ahal izan dute saria, ohi bezala.
Gaur arratsaldeko 15:30etan elkartu dira parte-hartzaileak Beasaingo udaletxeko batzar aretoan, sari-banaketa egiteko. Leire Artola alkatea eta Elena Ruiz zinegotzia arduratu dira sari hauek banatzeaz. Ekitaldiaren hasieran aurten erretiroa hartu duten merkatariak omendu dituzte, oroigarri bana emanez, eta ondoren, hasiera eman diete sari-banaketari.
Argi dago aurtengoan arropa dendak izan direla erakusleihoak atontzen trebeenak, hiru sariak arropa dendek eraman baitituzte. Kontuak kontu, ekitaldiari jarraipena emateko hirugarren saria banatzen hasi dira lehenbizi. Hau Kux-Kux haurrentzako arropa dendarentzat izan da. Bigarrena, berriz, Andreak arropa denda. Bi hauek garaikurra eskuratu dute eta lehenengoak, hau da, aurtengo irabazleak, Xalo arropa dendak, garaikurra eskuratzeaz gain urte osoan erakusleihoa dohainik aldatzeko zerbitzua irabazi du. 4 erakusleiho aldaketa izango dira guztira, denboraldi bakoitzerako bat, eta arropa denda honek zerbitzu hori jasoko du denboraldi bakoitzerako.
Beraz, hala geratu da aurtengo Gabonetako Erakusleiho Lehiaketako sailkapena:
- Xalo arropa denda
- Andreak arropa denda
- Kux-kux haurrentzako arropa denda
Horrez gain, urtero erosketa txeke batzuen zozketan sartzen dira erakusleiho lehiaketan bozka eman dutenak. Aurtengoan hauek izan dira zozketaren irabazleak:
- 200€: Janire Miret
- 100€: Mertxe Madrid
- 100€: Conchi Rapón
