La Vilaren kontra jokatuko du Ampo Ordiziak 2. itzuliko lehen partida
Larunbatean izango da, Altamira zelaian, 16:00etan. Lehen itzulia zortzigarren postuan bukatu dutenez, bigarren multzora sailkatu dira. Multzo horretako lehen bi postuetan amaitu beharko dute playoff-ak jokatu ahal izateko.
Lehen itzuliko azken partiduko argazkia, igandean, Altamiran, VRAC-en kontra.//Maider Insausti Ampo Ordiziak Ohorezko Mailako liga erregularreko lehen itzulia zortzigarren postuan amaitu du. Kopatik kanpo geratu dira, baina ligako tituluaren lehian sartzeko aukera badute oraindik. Lehen itzulia amaituta, bigarren itzuliko partiden zozketak egin ditu Rugby Federazioak. Ampo Ordiziak La Vilaren aurka jokatuko du larunbatean bigarren itzuliko lehenengo partida, etxean, Altamira zelaian, 16:00etan.
Zazpi jardunaldi izango dituzte aurretik bigarren fasea amaitu arte. Sei partida jokatuko dituzte, eta jardunaldi batean atsedena izango dute. Bigarren multzoan sartu dira, Ampo Ordiziaz gain, Les Abelles, Gernika, Pozuelo, La Vila, Belenos eta Cisneros. Bigarren itzulia amaitzen denean, ligako titulua playoff-etan erabakiko da, lehen multzoko lehen sei taldeen eta bigarren multzoko lehen bi taldeen artean. Playoff-ak jokatu ahal izateko, bere multzokoen artean lehen bi postuetan amaitu beharko dute hala ordiziarrek.
Aukera badute, talde horiei erreparatuta bigarren geratu baitira sailkapen orokorrean, Cisnerosen atzetik. Gernikaren, Pozueloren, La Vilaren eta Belenosen aurka irabazi egin zuen Ampo Ordiziak lehen itzulian, eta Les Abellesen eta Cisnerosen aurka, berriz, galdu. Sailkatuz gero, playoff-eko final laurdena maiatzaren 21ean jokatuko lukete; lehenak geratuz gero, lehen multzoko bigarrenaren aurka jokatuko lukete, eta bigarren geratuz gero, berriz, lehen multzoko lehenengo taldearen kontra. Aurrera eginez gero, finalerdia maiatzaren 28an izango lukete. Final handia ekainaren 4an jokatuko da.
Bigarren itzuliko Ampo Ordiziaren partiduak:
- 14. jardunaldia: CR La Vilaren aurka, Altamira zelaian, larunbatean, 16:00etan.
- 15. jardunaldia: CR Cisneros-en aurka, Madrilen, martxoaren 11n.
- 16. jardunaldia: Belenos RC-ren aurka, Avilesen (Asturias), martxoaren 11n.
- 17. jardunaldia: Pozueloren aurka, Altamiran, apirilaren 2an.
- 18. jardunaldia: Les Abelles-en kontra, Valentzian, apirilaren 16an.
- 19. jardunaldia: Atsedenaldia.
- 20. jardunaldia: Gernikaren aurka, Altamiran, apirilaren 30ean.
