Gloria Martinez de Gereñuk eta Jose Ramon Hernandezek Legazpiko Gizarte Saria jaso dute
Gloria Martinez de Gereñuk eta Jose Ramon Hernandezek Legazpiko Gizarte Sariak jaso zituzten atzo. Ekitaldia kultur etxean egin zen eta hasi aurretik minutuko isilunea egin zuten, auto istripuan hil diren Andoni Zabaletaren eta Igor Iñurritegiren omenez.
Ekitaldian herritar asko elkartu ziren eta aretoa txiki gelditu zen. Izan ere, Hernandez eta Martinez de Gereñu oso ezagunak eta maitatuak dira. Martinez de Gereñuri bere bilobak eman zion lore sorta eta Hernandezen alaba Inmak testu bat irakurri zuen familia osoaren izenean. Gurasoak goraipatu zituen. Koldobike Olabide alkateak eta Eric Galvez zinegotziak Juan Mari Burgueraren eta Ricardo Mediavillaren artean egindako orogarriak eman zizkieten omenduei.
Martinez de Gereñuk Nagusilan eta Caritasen lan egiten du eta Gizarte Zerbitzuetako zinegotzia izan zen. Hernandez Nagusilaneko boluntarioa da eta guraso elkarteetan lan handia egin du. Biek udalari eskerrak eman zizkioten eta legazpiarrak gizartearen alde lan egitera animatu zituzten.
Legazpiko Udaleko Gizarte Ekintzako Zerbitzuak sortu zituen iaz Gizarte Sariak, eta aurten bigarren aldiz eman ditu. Gizarte arloan herritarrek egindako lanari aitortza egitea dute helburu. Sariaren bidez, «programa eta proiektu desberdinetan parte hartzeagatik, borondatez laguntza eskaintzeagatik eta Legazpiko gizarte lan komunitarioan egindako lanagatik nabarmendu diren pertsonak edo erakundeak aitortu eta eskertu» nahi ditu udalak.
