Gizarte arlorako diru laguntzak bideratuko ditu Beasaingo Udalak
Elkarteei eta bertan bizi diren pertsona eta familiei zuzendutako laguntzak dira. Kultura, euskara, kirola, merkataritza eta genero berdintasunarekin lotutako laguntzen oinarriak ere onartu dira.
Beasaingo udalbatzaren otsaileko osoko bilkuran hainbat laguntza eta diru laguntzen oinarriak onartu ziren. Aipagarrienen artean, gizarte ongizatearen arlokoak. Beasaingo Udalak hainbat legealdi daramatza aurrekontuko diru sarrera arrunten % 1a lankidetza programetara bideratzen; 2023an 185.000 eurokoa da kopurua, % 70 garapen proiektuetarako (129.364 euro), eta gainerako % 30a lankidetza ekintzetarako (55.430,14 euro).
Kalteberatasun-egoeran dauden kolektiboen beharrei aurre egiteko, 92.000 euroko kreditua esleitu zuen aurrekontuetan erakundeei diru laguntzak emateko. Beasainen lan egiten duten eta egoitza iraunkorra herrian duten elkarteentzat izango da laguntza. EAJ (10) eta PSE-EE (2) taldeen aldeko botoekin eta EH Bilduren abstentzioarekin onartu ziren oinarriak (5).
Pertsona eta familientzako
Gizarte babeseko beste sistema batzuek edota laguntzak estali ezin dituzten oinarrizko gastuei aurre egiteko nahiko baliabide ekonomikorik ez duten pertsona eta familientzako, laguntza ekonomikoak ematea ere onartu zen. 7.500 euroko kreditua dago aurreikusita helburu horretarako, eta beharrezkoa balitz eskaeren arabera handituko litzateke. EAJ (10) eta PSE-EE (2) alde, eta EH Bildu (5) abstenitu zen.
Bestalde, mendekotasuna edo desgaitasuna duten pertsonek, autonomia maila handiagoa lor dezaten estimulazio eta errehabilitazio programentzat laguntzak jasotzeko oinarriak aho batez onartu zituzten. 6 urtetik 25 urte bitarteko beasaindarrentzat bideratuko dira.
Gainera, arrisku edo mendekotasun egoeran dauden adinekoen autonomia sustatzeko tailerrak emateko zerbitzua Lahar Elkargoari esleitzea aho batez ere onartu zen.
Beste laguntza batzuk
Kultura, euskara, kirola, merkataritza eta genero berdintasunarekin lotutako laguntzen oinarriak ere onartu zituen udalbatzak, guztiak aho batez.
