Urteko lehen Dantzari Txiki Egunak igandean izango dira, Goierriko hiru herritan
Ormaiztegin, Zaldibian eta Zegaman ospatuko dituzte urteko aurreneko dantzari topaketak. Seguran ere saioa egingo du Azpilla taldeak. Dantzari gazteek, berriz, lau egun dituzte aurten
Hiru herritan aldi berean elkartuko dira, igandean, Goierriko dantza taldeetako dantzari txikiak. Ormaiztegin, Zaldibian eta Zegaman ospatuko dituzte urteko lehenbiziko topaketak.
Zaldibian, Iztueta taldeak antolatuta, sei talde izango dira 31. Dantzari Txiki Egunean: Amets Bide (Ordizia), Aurtzaka (Beasain), Irrintzi Alai (Legorreta), Alurr (Ibarra), Gure Txokoa (Bera) eta Iztueta. 11:00etan hamaiketakorako elkartu, eta desfilea 12:00etan hasiko da. Plazako saioa 13:00etan hasiko da, eta bazkaria 14:00etan. Xaibor DJak girotuko du arratsaldea (16:30).
Ormaiztegin, Goruntz taldeak antolatuta, bost talde ibiliko dira: Oin Arin (Lazkao), Amets Bide (Ordizia), Irrintzi (Zumarraga-Urretxu), Aurtzaka (Beasain) eta Goruntz. 11:00etan Zubipe kiroldegian elkartuko dira, eta kalejira 11:30etik 13:30era egingo dute. Goizeko jaia izango da.
Zegaman, Tobera musika eskolak antolatuta, bost talde izango dira: Solkie (Zerain), Aurtzaka eta Ostadar (Beasain), Oin Arin (Lazkao) eta Tobera. 10:45ean eskolan hamaiketakoa egin, eta 11:30ean da desfilea. Lau geldialdi dituzte, plazan amaituz.
Dantzari txiki adinetik pasatu direnek ere badituzte lau aukera dantza egiteko. Idiazabalen, Zaldibian, Anoetan eta Legorretan antolatu dituzte Dantzari Gazteen Topaketak.
Seguran, dantza saioa
Seguran ere dantza izango da asteburuan. Azpilla taldeak udaberriko emanaldia egingo du, larunbatean 12:30ean, plazan.
Ormaiztegin beste ekimen bat badute, dantzarekin lotutakoa. Ekainaren 23an, San Joan bezperako ekitaldia antolatzen duten dantzari eta musikari gazteek deialdi ireki bat egin dute. Herritar guztiei dantzak ikasteko aukera emango diete. Ostiralean, 18:15ean, gizarte-etxean aurkezpena egingo dute, eta herriko ohitura, dantza eta musika gustuko dituzten adin guztietako herritarrak gonbidatu dituzte.
Dantzari egunak 2023
Dantzari Txikiak
- Igandean. Ormaiztegi
- Igandean . Zaldibia
- Igandean . Zegama
- Apirilak 23. Legazpi
- Apirilak 23. Legorreta
- Maiatzak 7. Ordizia
- Maiatzak 14. Beasain
- Maiatzak 14. Zumarraga
- Ekainak 11. Lazkao
- Ekainak 18. Urretxu
Dantzari Gazteak
- Apirilak 22. Idiazabal
- Maiatzak 20. Zaldibia
- Ekainak 2. Anoeta
- Ekaina. Legorreta