Kultura garaikideko eta landa eremuko adituak Igartubeitin
Barne begiradak. Sorkuntza garaikidea landa eremutik programaren barruan (Ber)Topaketak. Artea, lurraldea eta landa eremuak izeneko jardunaldia antolatu dute Igartubeiti baserri museoan datorren martxoaren 28 eta 29an. Benito Burgos, Marc Badal, Eva Caballero, Koldobika Jauregi, Laurita Siles eta Gari Aranbarri izango dira parte hartzaileetako batzuk.
Gaur egun landa ingurunean bizitzeak esan nahi duena arakatzeko helburuarekin antolatu dute jardunaldi hau, lanketa honetan, «berrikuntza soziala eta jardunbide artistikoa» izango dituzte baliabide nagusiak.
Hitzaldiak eta topaketa
Martxoaren 28an Marc Badal, David G. Ferreiro, Fernando Garcia Dory artista eta agroekologoa, Eva Caballero Creando por Soria ekimenaren bultzatzailea eta Koldobika Jauregik hitzaldiak eta aurkezpenak egingo dituzte. Martxoaren 29an, Benito Burgos, Maria Jose Telleria, Luis Martinez, Laurita Siles eta Gari Aranbarrik beste horrenbeste egingo dute. Gehienez, 20 lagunek parte hartu ahal izango dute jardunaldian eta izena emateko igartubeiti@gipuzkoa.eus helbidera idatzi edo 618 004 131 zenbakira mezu bat bidali daiteke. Online ere egin daiteke izen ematea Igartubeiti baserriaren web gunean.
