Bertsoa modako dago Goierrin
Bertsolaritza-ekitaldi ugari antolatu dituzte asteotan. Zaldibian X. Osinberde sariketa jokatuko da bihar. Lazkaon, Lazkao Txiki omenduko dute etzi. Gazteak ere, gurdira.
Olaberrian, Ataunen, Zaldibian, Lazkaon… Asteburu honetan eta hurrengoan bertso-hotsak izango dira nagusi. Ekitaldi mordoxka antolatu dituzte bertsolaritzaren inguruan. Gazteak ere batu dira zaletasun horretara; Olaberriko eta Ataungo saioak eredu.
Zaldibian, Osinberde
Zaldibiako Osinberde bertso sariak 10. ekitaldia du, bihar. Joxepane ostatuan izango da, bertsolari gazteentzat. Afaria 20:30ean izango da, jangela gainezka dela. Saioa entzuteko tokia egongo da gero, nahi duenarentzat.
Bittor Altube (Abadiño), Maddi Aiestaran (Beasain), Iker Ormazabal (Hernani), Xabat Illarregi (Leitza), Ekhiñe Zapiain (Bera) eta Unai Izagirre (Azkoitia) dira kantuan. Bi lehenak Osinaldera sailkatuko dira. Osinberde saria epaileen puntuazioz lehenengoak jasoko du. Aurreneko biak joango dira Gabiriara. Entzuleek ere emango dute beren saria. Joxi Irastortzak aurkeztuko du, eta Martin Aramendi, Mikel Urteaga, Alaitz Sarasola eta Iñaki Murua Gorriñe, epaile.
Lazkao Txiki gogoan
Apirilaren 3an 30 urte beteko dira Joxe Migel Iztueta Lazkao Txiki hil zela. Urtero bezala, Gerriko kultur elkarteak gogoratzeko omenaldi-ekitaldia prestatu du, eta igandean 12:30ean izango da, Zelaiko irudiaren aurrean.
Lazkao Txiki Musika Eskolako ikasleek parte hartuko dute, musikarekin. Oso gazteak eta oso adinekoak elkartuko dira. Oin-Arineko dantzariek koreografia bat dantzatuko dute. Bertsoak ere presentzia ezinbestekoa duela Lazkao Txikiren omenaldian, eta Goierriko Bertso Eskolako ikasle batzuek jarriko dute alea.
Martxoaren 31n, Maialen Akizuk eta Joanes Illarregik bertso-afaria izango dute, Gerriko txokoan (20:30). Afaritarako izena astelehenerako eman behar da (688 82 28 71, 943 88 65 00; gerrikokultura@gmail. com). Helduak 25 euro ordainduko du, 18 urte artekoek 15, ikasle eta langabetuek 18. Ondorengo bertso-saioa entzuteko sarrera libre da.
Beasainen, bertso afaria
Sebastian Lizaso eta Aitor Mendiluzerekin bertso afaria izango da Beasaingo Batzoki Kultur Elkartean, gaur, 21:00etan. Txartelak salgai daude 25 euroan, Batzokiko tabernan edo 943 88 36 16 telefono zenbakira deituta.
Olaberria, bertso afaria
Olaberriko I. Gazte Festak hasteko, gaur gauean bertso-afaria izango da, Ihurrezaharra eraikinean. Iker Zubeldia, Aratz Igartzabal eta Mikel Etxezarreta olaberritarra ariko dira bertsotan. Iaz, Korrikaren ingurumarian, egundoko arrakasta eduki zuen halako bertso-afari batek, ehun afaldar-entzuletik gora batuta.
Ataunen, bertso afaria
Ataungo Torto gazte asanbladak ere bertso-afaria antolatu du. Gaur zortzi izango da, martxoaren 31n, Oargin. Iban Urdangarin eta Iker Zubeldia ariko dira. Afari-txartelak (18 euro) erosteko azkeneko eguna igandea da, Ataungo ohiko tabernetan.
Giro ederra Aztirian
Aho zapore gozoarekin geratuak dira Aztiriko erretegikoak, lehengo ostiraleko bertso-afariarekin. Iker Zubeldia eta Aratz Igartzabal ziren kantuan, Miren Deba eta lagunak trikitiarekin. Jangela 80 afaldarrekin beteta, egundoko giroa sortu zen.
Hurrena, apirilaren 1ean, zapatua, Aztiri-Bat elkartean egongo da bertso gosea asetzeko aukera, Aztiri Sariarekin. Txartelak erreserba litezke (668 36 90 31).
Ostegunean Seguran
Iparra-Hegoaren barruan 500 lagun elkartzen dituen bertso afaria izango da ostegunean, Amets eta Maialen Arzallus eta Iker Zubeldiarekin. Sarrerak salgai daude Elorripen.
