Lore eta landare azoka egingo dute Seguran, udaberriarekin batera

Hamahiru lore, landare eta barazki postu egongo dira; ekoizle goierritarrak ere izango dira. Azoka igande goizean izango da. Udalak polinizazioa bermatzeko neurriak hartuko ditu.

Josune Zarandona

Segura

2023/03/24

Segurako lore eta landareen azoka egingo da etzi. Udaberriko liliena izango da, bereziki, urte sasoi berriarekin bat. 21. azoka izango da aurtengoa.

10:00etan zabalduko ditu ateak azokak. Lore, landare eta barazki postuei dagokienez, dozena bat ekoizle baino gehiago izango dira. Hiru, goierritarrak: Aldatagoena lorategi segurarra, Haritz Urretabizkaia aramarra eta Iñaki Azanza zaldibiarra. Euskal Herriko elikagai ekoizleen postuak ere izango dira –pastak, gozoak, gaztak, eztiak…– Baita ere eskualdeko artisauak eta Orereta Ikastolari laguntzeko merchandising salmenta gunea.

10:30ean, Josu Osak Txerto ezberdinak fruta arboletan ikastaroa eskainiko du, goiz osoan zehar. Herriko trikitilariak eta Kriseilu txistulari taldeko kideak kalez kale ibiliko dira, girotze lanetan. 15:00etan amaituko da azoka.

Jarraipena
Azokak jarraipena izango du. Segurako Udalak, esaterako, polinizatzaile basatien dibertsitatea handitzeko neurriak hartuko ditu, «herrian dauden komunitate floristikoak dibertsifikatzeko». «Hala, natura berreskuratuz, elikadura burujabetzarako eta aldaketa klimatikora egokitzeko urrats handia emango genuke», azaldu du Aitor Montes biologo segurarrak.

Apirilaren 23an, bestalde, Arbarraingo zotal-ikastegira txangoa egingo dute. 08:30ean abiatuko dira. Herri eskolako ikasleek ere egingo dute txangoa. Zuhaitzak landatzeko baliatuko dute, bide batez. Eta urrian, Maduran, Belardi eztidunaren ereintza egingo da.

POSTUAK

Lore, landare eta barazki