Festa giroko amaiera 'Barne Begiradak' egitasmoarentzat
Sara Azurza musikaria. ARGAZKIA: Santiago Farizano Barne Begiradak. Sorkuntza garaikidea landartasunetik proiektua amaitutzat emateko festa antolatu dute Igartubeitin datorren larunbaterako. Jakina den bezala, Gabirian, Zerainen eta Ezkion gauzatu da egitasmoa, lurraldean bizitzeko modu berrien inguruan hausnarketa sustatuz eta ekintzarako espazio berriak sortuz.
Urtarrilean eman zitzaion hasiera proiektuari eta hiru hilabete hauetan saio esperimentalak, egonaldi artistikoa eta topaketak antolatu ditu Igartubeiti baserri museoak.
Amaiera jai giroan
Egitasmoa festa batekin amaituko dute larunbat honetarako, 18:00etan. Egitasmoko parte hartzaileekin topaketa egingo dute aurrena. Barne begiradak. Sorkuntza garaikidea landartasunetik dokumentalaren proiekzioa eta Sara Azurza musikariaren emanaldia izango dira eta afari merienda batekin borobilduko dute arratsaldea. Izen ematea irekita dago, dagoeneko.
