Irati Zubizarreta beasaindarra hirugarren dago Skyrunner World Series zirkuituko sailkapen nagusian
Zirkuituko bigarrenean, Skyrace des Matheysins lasterketan, Frantziako Alpeetan, bosgarren postua egin du, sailkapen nagusian, lehenengo hiruen artean kokatu duena. Hirugarren lasterketa ekainaren 3an izango da, Austrian.
Irati Zubizarreta Skyrace des Matheysins lasterketan. // Argazkia: Franck Oddoux Irati Zubizarreta mendi lasterkari beasaindarrak bosgarren egin du Skyrace des Matheysins lasterketan, Frantziako Alpeetan. Skyrunner World Series zirkuituko bigarren proba izan da honakoa eta bertan lortutako emaitzari esker, sailkapen nagusian hirugarren postuan kokatu da Zubizarreta. Lasterketa oso teknikoa, 25 kilometro luze eta 1.930 metroko desnibelekoa, baina lasterkari beasaindarrak lan bikaina egitea lortu zuen (3h eta 12 min). Egindakoarekin “oso pozik”, hurrengo hitzordurako “gogotsu” dago. Ekainaren 3an , Austrian, Hochkoning-en. Munduko zirkuituko hirugarren lasterketa izango da.
