«Azpiegitura izugarririk hitz eman baino, garrantzitsuago ikusten dugu daudenak egokitzea»
Aurpegi berria izango da Ioritz Berra Zaldibiako Udalean. Alkategai aurkeztu du EH Bilduk.
Zer ekarpen egingo dio EH Bilduren hautagaitzak Zaldibiako herriari?
Agintaldi ezberdinetan ezkerreko independentismoak Zaldibiako udalean egindako lan bikainari segitzeko asmoz gatoz. Herritarrengandik gertu lan egitera ohituta dagoen tradizio baten katebegi berriak gara. Alde horretatik, ondo egindakoak indartu eta moldatu beharrekoak aldatzeko prestutasunez gatoz.
Zein dira datozen urteetarako proiektu nagusiak?
Legegintzaldi erronka nabarmenena plazaren eraberritzea izango da. Herritar, unibertsitateko ikasle eta adituekin elkarlanean diseinatu dugun plaza errealitate bihurtzeko garaia izango da.
Bestalde, herriko espazioen lehentasunak ondo zehaztu eta mugikortasun azterketa bat egin nahi dugu. Gainera, eta gure eskumena ez bada ere, Ordiziarako bidegorria egiten den legegintzaldia izan behar da derrigorrez honako hau. Ez da ulergarria egungo larrialdi klimatikoan instituzioek mugikortasun garbirako azpiegitura oinarrizko hau ez burutzea.
Azpiegitura izugarririk hitz eman baino, garrantzitsuago ikusten dugu dauden azpiegiturak egokitzea (Kimuene kulturgunea, Luberri kirolgunea) eta, batez ere, berauen erabilpena bultzatzea. Dauzkagun baliabideak herritarrentzat interesgarri diren kultur, aisialdi eta dinamiketara bideratu behar ditugu.
Zaintzaren gaiari ere heldu nahi diogu, unibertsaltasunerako pausuak emanez. Ezin da gutxi batzuen eskubidea izan eta, batez ere, ezin du gutxi batzuen bizkar segi. Harreman parekide, hezitzaile eta inklusiboak baimendu dituzten proiektuak indartzeko asmoa ere badugu (Herri Hezitzailea, Herri Lagunkoia, Herri Harrera Integrala…)
Lehenengo aldiz aurkeztu zara alkatetzarako. Nola ikusten duzu zure burua?
Erronka polit bezala ikusten dut aukera hau. Etor daitekeenak errespetua sortzen badit ere, gauza berriak probatu zalea naiz eta gauza askotaz ikasteko aukera paregabea dela iruditzen zait.
Kontuan hartu behar da normalean aurpegi nabarmenena alkategaiarena dela, baina ondoan izango dudan taldea aipatu nahiko nuke. Lehengo taldetik datozenak eta kide berriekin osatu dugu taldea, eta uste dut hori oso emankorra izango dela.
Zaldibiako EH Bilduren hautagaiak:
-
Ioritz Berra Juaristi.
-
Eztitxu Mujika Mariezkurrena.
-
Maider Castellano Etxeberria.
-
Xabier Iraeta Mendizabal.
-
Maialen Mendizabal Luluaga.
-
Katrin Lizarralde Nazabal.
-
Raquel Andrés Durá.
-
Pedro Maria Olano Azurmendi.
-
Sergio Dosantos Barrutia.
Ordezkoak:
-
Nerea Murua Arrese.
-
Jon Gantzarain Leunda.
-
Jose Gregorio Matxain Garmendia.
