San Adrianera erromesaldia egingo dute igandean
Joseba Izagirre Zegamako alkatea eta Iñaki Alberdi Idiazabalgoa alkate-makilak trukatzen, iaz, Zegaman. ARGAZKIA: Maider Insausti Urteroko ohiturari jarraituz, San Adrianera Erromesaldia egingo dute igande honetan, ekainak 4. San Adrianen topaketa egin eta gero, Zegaman, Seguran eta Idiazabalen geldialdiak egingo dituzte parte hartzaileek, ibilaldia osatzeko.
Idiazabalgo Udalak 7:30ean egin du hitzordua herriko plazan, Otzaurteko Bentara autobusez joan nahi duten herritar horientzat. Bihar da izena emateko azken eguna. 696 690 887 zenbakira deituta egin daiteke. Gainerakoan, 7:45ean emango diote hasiera ibilaldiari Otzaurteko Bentan. San Adrianera 9:30 inguruan iristea aurreikusi dute. Han, ohi bezala, anis banaketa egingo dute, baina aurten ez da mezarik izango.
Alkate-makilen trukea
Alkate-makilen trukaketaren txanda izango da beherakoan: 12:00etan, Zegaman —mokadutxoa egongo da—; 13:00ean, Seguran —mokadutxoa eta dantza—, eta 14:00etan Idiazabalera iritsiera, Birigarro txistulari taldeak lagunduta.
