Ekainaren 10eko 43. Korpus Kroserako izen ematea zabalik dago
Ekainaren 10ean Korpus eguna ospatuko dute Legorretan. Eguneko egitarauaren barruan, 43. Korpus Krosa jokatuko da, eta izen ematea zabalik dago dagoeneko. Gazteen lasterketa 10:30ean izango da, eta helduena 11:30ean. Helduen proba
7,5 kilometrokoa da, ibilbidean hiru itzuli emanez.
Parte hartu nahi dutenek aurrez Kirolprobak.com webgunean eman dezakete izena. Izena ematen dutenen artean Intsausti jatetxean bi lagunentzako afaria zozkatuko dute. Egunean bertan ere eman ahal izango da izena plazak geratzen badira, 11:00ak arte, udaletxean.
Ardo dastatzea
Korpus Eguna haurren zein helduen krosarekin hasiko da, goizean, baina arratsaldean jarraituko du festak. 18:00etan,
32. Ardo Dastatze Lehiaketa izango da. Gehienez 90 lagunek parte hartuko dute. 18:30ean, udalak ardoa eskainiko die herritar eta bisitari guztiei, eta 19:30ean, usadiozko merienda izango da plazan. Bukatzeko, Iraunkorrak txarangak kalejira egingo du herrian barrena.
