Zaldibiako udal aretoak eta baliabideak webgunetik hartu ahalko dira
Zaldibiako Kimueneko aretoaren irudi bat. Zaldibiako Udalak Eskatu zerbitzua eta webgunea jarriko du erabilgarri. Udalaren aretoak, tresnak eta baliabideak erreserbatzeko zerbitzua da. Herritarrek, talde zein eragileek handik egin ahalko dute eskaera.
Orain arte ZaldibiApp aplikazioak bete duen lekua hartuko du Eskatu webguneak. «Areto eta baliabideen erreserba errazteko eta arintzeko sortutako ataria da», argitu du udalak. Sakelako telefonotik edo ordenagailutik erabili ahal izango da, eskatu.zaldibia.eus helbidean.
Zein azpiegitura, material eta bitartek publiko erabil daitezkeen ikusteko, katalogo bat prestatu du udalak, guztiak bateratuta.
Aurkezpena etzi
Ostiralean 18:30ean egingo dute Eskatu zerbitzuaren aurkezpena, udaletxeko herri aretoan. Funtzioamendua eta martxan noiz jarriko duten esango dute.
Azpiegituren bilduma kontsultagai dago dagoeneko. Karreane kultur etxeko bi areto, Herri Antzokia, Kimuene eraikineko bederatzi gela, udaletxeko bi areto, Luberri eraikineko kirol aretoa edo gimnasioa, Resti pilotalekuko kantxa nahiz aldagelak, eta plazako Toki Alai pilotalekua daude erreserba litezkeen lokalen eta lekuen zerrendan.
Bestetik, aulki-mahaiak, platerak eta ontziak, suak eta txapak, musika ekipoak, karpak, hondakin kuboak, proiektorea, argi-hartuneak eta egurrezko kutxa ere eskatu ahalko dira.
