Autobus zerbitzua indartuko dute G2H ikustera joateko
Larraitzera igotzeko autobus bakarra egongo da: 23:15ean. Itzultzeko bi aukera egongo dira: 01:30ean eta 02:30ean
Goierriko 2 Handiak probako lasterkariak, Larraizko anoa-gunean. Argazkia: Iñaki Gurrutxaga G2H proba ikustera joateko beste autobus zerbitzu bat jarriko du antolakuntzak uztailaren 7an. Ikusleak Larraitzera eraman eta bueltan ekarriko ditu autobus linea honek.
Igotzeko autobus bakarra egongo da: 23:15ean aterako da Beasaingo plazaren goiko aldeko autobus geltokitik. Itzulera Larraitzeko beheko aparkalekutik izango da. Kasu honetan bi aukera egongo dira: lehen autobusa 01:30ean aterako da eta bigarrena, 02:30ean.
Autobusean sartzeko lehentasuna izango dute korrikalarien laguntzaileek. Horiek laguntzaile txartela erakutsi beharko dute. Itzulerakoan korrikalariren batek lasterketa Larraitzen utziko balu, honek lehentasuna izango luke beste guztien aurretik.
