Hastear da garagardo festa
Ordizia Rugby Elkartearen Garagardo Azoka bihartik igandera izango da. 23 garagardo ezberdin egongo dira salgai. Aurten 50. urteurrena beteko du Ordizia Rugby Elkarteak.
Ordizia Rugby Elkarteak antolatutako garagardo azoka, iaz. // Argazkia: Arkaitz Apalategi Ordizia Rugby Elkarteak antolatzen duen Garagardo Azokarako atzera kontua amaitzear dago. Bihar irekiko dute 23. Garagardo Azoka, ohi bezala Beti Alai pilotalekuan. Igandera arte jai giroan murgilduko da Ordizia, garagardoaren eta errugbiaren bueltan. 18:00etatik 00:00etara egongo da irekita frontoiko gunea. Igandean bazkariak emango dituzte.
Garagardo Azokako ohiko menua eskainiko dute: ukondoa, saltxitxak, patata purea, postrea eta kafea. Iaz hanburgesa beganoak egon zen salgai. Aurten, berriz, egunero plater begano ezberdin bat egongo da. Kroketak ere salduko dira. Jatekoa etxera eramateko aukera dago. Edariari dagokionez, aurten 23 garagardo ezberdin jarriko dituzte salgai. Igandean, Frantziako Tourra Ordiziatik pasako dela eta, herritar guztientzako eskainiko dute aurreko egunetako menua. Paella erraldoia egingo dute, eta dohainik izango da elkarteko bazkideentzat.
Larunbatean The Burrunbazale Fat Dutchmen-en kontzertua izango da, eta igandean, mus txapelketa jokatuko da. Parte hartu nahi dutenek azokan bertan eman behar dute izena.
Aurten 50 urte
Ordizia Rugby Elkarteak 50.urte beteko ditu 2023an. Elkarteak jakinarazi duenez, datorren denboraldian elkartearen armarria egokituko dute urteurrena oroitzeko. Ordiziako Mendizaleak elkartearen sail bat izan zen sorreran rugby taldea. 1973ko urriaren 2an gazte talde batek errugbian entrenatu eta jokatu ahal izateko espazioa eskatu zion udalari, eta lehenengo partida RC Irunen aurka jokatu zuen, urte bereko urriaren 28an. Urtez urteko lanaren ondorioz, erreferente da Ordizia Rugby Elkartea Euskal Herriko zein estatuko errugbi zaleen artean. 2023/2024an euskal talde bakarra izango da Ohorezko Mailan.
Urteurreneko ospakizun gisa, I. Beteranoen Errugbi Txapelketa antolatu du elkarteak irailaren 23rako eta 24rako. Altamira Estadioan izango da. Txapelketan parte hartu nahi duten taldeak elkartearekin harremanetan jartzera deitu dituzte, info@ordiziarugby.eus helbide elektronikora idatzita.
