Legazpi prest dago igandeko Artzain Egunerako
Matias eta Olasagasti, aurtengo Artzain Egunaren kartelarekin. Argazkia: Tere Madinabeitia Gipuzkoako Artzain Egunerako dena prest dago. Igandean egingo da Legazpin, eta Edurne Matias zinegotziak eta Urtzi Olasagasti Nekazaritza eta hirigintza udal teknikariak eman dituzte artzaintzaren festa handi honen xehetasunak. Ohiko egitaraua izango du, baina berrikuntza batzuk ere txertatu dituzte.
Udaleko bi ordezkariek azaldu dutenez, «Latxa ardia, Idiazabal gazta eta artzain txakurraren inguruko egitarau oparoa» antolatu dute. Artzain Eguna Euskal Herria plazan ospatuko da, 10:00etan hasita, eta arratsaldean Urtatzan jarraituko du, artzain txakur txapelketarekin.
Artzaintzarekin zerikusia duten lehiaketa, erakustaldi eta dastaketez gain, artisautzak ere izango du tokia. Aurten 13 postu izango dira, eta horien artean, lau legazpiar. «Zurarekin landutako produktu ezberdinak, baserritar jantziak, makilak, larruzko abarkak, egurrean tailatutako produktuak…» izango dira.
Horiek guztiak betikoak dira, baina aurten berrikuntzak daude, «abereen ongizatearekin» zerikusia dutenak. Hala, ardiek ura edateko baldeak jarriko dituzte plazan, eta eguzkia egitekotan itzala izan dezaten, udaletxetik azokaraino estalki bat jarri dute.
Omenaldiak
Omenaldiak ere ez dira faltako, eta aurten Legazpiko Juanjoxe Aranguren eta Arantxa Segurola izango dira omenduak, Ameriketan artzain izan eta gaur Donezteben (Nafarroa) bizi diren Joxe Mari eta Benjamin Altxu Almandoz anaiekin batera.
ARTZAIN EGUNA. IRAILAK 3
- 10:00. Postuen irekiera.
- 10:45. Gipuzkoako Artzain Gaztaren 39. lehiaketa, hasiera.
- 11:00. Gaztagintza ikastaroa haur eta gaztetxoentzat; gazta dastaketa eta herritarren saria; Legazpi Musika banda, kalejira.
- 11:30. Sagardo dastaketa (bost postu) eta gazta salmenta.
- 11:45. Artzain txakurren erakustaldia, Aritz Ganboarekin.
- 12:00. Gazteen epaimahaia gazta lehiaketan.
- 12:00. Ardi okelaren 31. lehiaketa (bost partaide).
- 12:15. Ardi mozketa.
- 12:45. Ardi-okelaren banaketa.
- 13:00. Omenaldiak.
- 13:30. Sari banaketak.
- 14:30. Herri bazkaria Aitxurin.
- 17:30. Gipuzkoako 54. Artzain Txakur Txapelketa. Urtatzan.
Tritikitxa. Elustondo anai-arrebak girotuko dute goiza.
Goizean. Latxa ardi eta ahari erakusketa; artisau azoka.
