Ehiza postuak zozkatuko dituzte
Bihar egingo dute Ezkion lehenengo zozka; Zegaman, aldiz, datorren asteazkenean.
Ehiza denboraldia, salbuespenak salbuespen, urriaren 12tik urtarrilaren 31 bitartean izango da, biak barne, eta elkarte ezberdinek ehiza lerroko postuen zozketak egiteko egunak iragarri dituzte.
Ezkioko Oreina elkarteak, esaterako, bihar egingo du lehenengo zozka, 20:00etan, udaletxeko arkupeetan. Zozka horietan jardunaldiak banatuko dituzte: ostiralean lortutako emaitzekin larunbatean, igandean eta astelehenean non aritu jakingo dute. Asteleheneko emaitzekin, aldiz, asteartean eta asteazkenean nora joan jakingo dute; eta, asteazkenekoekin, azkenik, ostegunean eta ostiralean non aritu. Azaroaren 14an amaituko dira zozketak.
Zegamaren kasuan, lehenengo zozka urriaren 11n egingo dute, udal pilotalekuan. Zozketak astelehen eta ostegunetan egingo dituzte, 19:00etan. Astelehenean jasotako emaitzekin asteartean, asteazkenean eta ostegunean non aritu jakingo dute; ostegunekoekin, aldiz, ostiralean, larunbatean, igandean eta astelehenean nora joan argituko dute.
