Cava festa izango dute asteburuan Zegaman
Iazko Cava jaialdia, Zegaman. / Argazkia: Goierriko Hitza. Bederatzigarren Cava Festa ospatuko dute Zegaman, asteburuan, eta egunak girotzeko ekitaldi ezberdinak antolatu dituzte. Larunbatean eta igandean izango da ospakizuna, eta musikak girotuko du herria: ostiralean Jo Motel txaranga arduratuko da jendea animatzeaz; larunbatean, aldiz, Pancho Balbuena Mexikarra. Gainera, bi egunetan autobus zerbitzua egongo da. Bihar autobusa 00:10ean eta 01:55ean aterako da Zegamatik Legorretara. Larunbatean, aldiz, ostiraleko ordutegiez gain 03:40ean ere egongo da zerbitzua.
Cava jaialdia 20:00etatik 01:00etara izango da, eskolako patioan, eta aurtengo gonbidatuak Zeraingo Oiharte (Sagardo Aparduna) eta Galiziako Valtea (Albariño Aparduna) dira. Bestalde, aurten Zegaman San Sadurni D’Anoiako Vlancher, Oliver Viticultors, Canals & Munné, Vilarnau, LLopart eta Raventos i Blanc upategiak izango dira. Cava kopa bakoitzaren prezioa 2,5€ eta 3€ artekoa izango da; botilarena, aldiz, 10€tik 15€artekoa.
Jaialdian, gainera, afaltzeko aukera egongo da: oilasko izterra piperrekin, solomo burua, ajoarrieroa, arroza barazkiekin, idi haragizko hanburgesak piperrekin, hanburgesa beganoa pikillo saltsarekin, saltxitxak, txorizoa, entsalada, gazta eta menbrilloa, pastak eta kafea.
