Bitxigintza izango da nagusi asteburuan Igartubeitin
Ondarearen Europako Jardunaldien baitan bitxigintzaren inguruko bi jarduera antolatu ditu Igartubeitik biharko; goizean bata eta arratsaldean bestea.
Tradizioa soinean: bitxigintza berria ondare etnografikotik abiatuta jarduera izango da lehena, 11:00etan. Aranzadi Zientzia Elkarteak eta Bideberri BHIko Bitxigintza Diseinuko Goi Mailako Zikloko ikasleak ondare etnografikoan oinarritutako bitxiak sortu dituzte, eta sorkuntza horiek hitzaldi eta erakusketa baten bidez ikusteko aukera egongo da bihar, Igartubeitin.
Horretaz gain, arratsaldea familian pasatzeko jarduera bat ere antolatu dute biharko Egizu zure bitxia laiekin! izenpean. Laia Euskal Herriko oin-golde motako laborantza tresna da, bi eskuekin erabiltzen dena, eta jarduera honetan egurrezko laiak erabiliko dituzte bertaratzen direnek bitxiak sortzeko. Marta Fernandez bitxigileak gidatuko du jarduera. Ekitaldi hau 16:30ean hasiko da.
Bigarren jarduera honetan partu hartu nahi izanez gero, 943 72 29 78 zenbakira deitu edo igartubeiti@gipuzkoa.eus helbidera idatzi behar da.
