Zertarako itxaron San Martin egunari
Zegaman gaur ekingo diete San Martin ospakizuneko egitarauari, ipuin kontaketa batekin. Bihar Asisko Urmenetaren hitzaldia dute, etzi herri kirol desafioa eta larunbatean, feria eguna.
Zegamako San MArtin feria, artxiboko irudi batean San Martin eguna larunbatean izango den arren, gaur bertan hasiko dituzte zegamarrek ospakizunak. Lur Korta ipuin kontalariak saioa eskainiko du Gaztelekuan, 18:30ean.
Sanmartinen bueltan igandera arteko egitaraua prestatu dute Zegaman. Gastronomia izango da nagusi: txerrikiak ez ezik, bestelako produktuak dastatzeko aukera izango da, esterako. Kultur eta kirol ekintzak ere gingo dituzte.
Bihar Asisko Urmeneta komikigileak komikiei buruzko hitzaldia eskainiko du. Saio hau ere Gaztelekuan izango da, baina 19:00etan. Etzi, literatur kontuak alboratu eta kirolari helduko diote. Joseba Arakamak eta Joxe Mari Esnaolak Xabier Dorronsororen eta Eneko Arzelusen aurkako herri kirol desafioa jokatuko dute. Apustua 19:00etan hasiko da, eskolako patioan. Iganderako, Aizkorri Guraso Elkarteak zine emanaldia antolatu du, eskolako gimnasioan, 15:30ean.
Gazta lehiaketa
Larunbata izango da egun handia, San Martin eguna. 09:00etan hasiko da festa, abereen erakusketarekin, artisau produktuen azokarekin eta Aizkorri-Aratz parke naturalerako gazten salmentarekin. Lehiaketa ere egingo dute. 24.na izango da aurtengoa.
13:30ean egingo dute sari banaketa. Pasa den urtean Olaberriko Aizpea gaztandegiak irabazi zuen. Azken hiru urteetan bi aldiz irabazi dute lehiaketa. Sariak banatutakoan txapelketan parte hartu duten gazten dastaketa egingo dute, herriko elkarteen laguntzarekin.
