Idiazabalgo areto futbol txapelketa abian da, etzi 3. jardunaldia
Idiazabalen, urtero bezala, areto futbol txapelketa antolatu dute. Azaroaren 5ean hasi zuten, eta urtero festetan amaituko dute.
Igandean Idiazabalgo areto futbol txapelketako 3. jardunaldia jokatuko dute. Urteroko ohitura bat da. Azaroaren 5ean hasi zuten lehia, eta urtero bezala festetan amaituko dute.
Jon Garmendia antolatzaileak adierazi du aurten 7 taldek hartu dutela parte. Hortaz, 7 jardunaldi egongo dira, eta egun bakoitzean hiru partida jokatuko dituzte: 17:00etan, 18:00etan eta 19:00etan. Urtarrilaren 7an amaituko dute sailkapen fasea eta urtarrilaren 14an jokatuko dituzte finalerdiak sailkatuko diren taldeek.
Aurten beterano talde batzuk parte hartzeari utzi diotela azaldu du Garmendiak, baina herriko gazteak animatu direla. «Herritar ugari hurbiltzen dira partidetara eta oso giro polita sortzen da igande arratsaldero. Gainera, kuadrillen artean pikea sortzen da».
Berrikuntza gisa, aurten, Garmendiak Instagram kontua sortu du: izalgo_futbito_txapelketa. Bertan, partiden jarraipena partekatzen du; emaitzak, sailkapen orokorra, etab.
Finalaren eguna «ikaragarria» izaten dela adierazi du, oraindik eguna zehaztu gabe dute, baina festetan egiten dute urtero. Festetako aitzakiarekin beste partidetan baino jende gehiago elkartzen da. Eta, gainera, partidaren ostean, parte hartutako guztiak sagardotegira joaten dira.
