Gorka Izagirre hirugarren Lezamako ziklo-krosean
Aitor Hernandez eta Diego Ruiz de Arkaute sailkatu dira ormaiztegiarraren aurretik. Aner Irizar zumarragarra berriz ere nagusitu da kadeteetan.
Gorka Izagirre, joan den asteburuan Ormaiztegin, haurrekin egindako teknifikazio saio batean. // Argazkia: Angel Elortza Orain hilabete pasa Tolosako ziklo-krosean lortutako laugarren postua hobetu du asteburu honetan Gorka Izagirre txirrindulari ormaiztegiarrak Lezaman (Bizkaia). Hirugarren sailkatu da Aitor Hernandez bizkaitarraren eta Diego Ruiz de Arkaute arabarraren atzetik. Tolosan ere aurretik izan zituen bi txirrindulariok Izagirrek.
Garaipenak lortu eta lortu jarraitzen duena Aner Irizar zumarragarra, Lezaman ere aurrena sailkatu baita kadeteetan.
Goierrin bi proba
Tolosan abiatu da aurten ziklo-kros denboraldia urriaren 22an, eta Goierrin, bi proba soilik jokatuko dira: Segurakoa abenduaren 10ean eta Ormaiztegikoa urtarrilaren 7an.
